Jambyl oblysynyń Jańatas qalasynda kóshelerdi sý basty
TARAZ. KAZINFORM – Jambyl oblysynyń Jańatas qalasynda kólbeý aǵyn paıda bolyp, kóshelerdi sý basyp, úılerge de kirip jatyr.
Jambyl oblysynda mol mólsherde túsken jaýyn-shashyn saldarynan Sarysý aýdanynda kólbeý aǵyn paıda boldy. Qazir onda úılerdi sý basý qaýpi týyndap tur.
Jambyl oblystyq Tótenshe jaǵdaılar departamentiniń habarlaýynsha, 7 shilde kúni saǵat 17:00-de Sarysý aýdany Jańatas qalasynda jańbyrdyń saldarynan Baıseıitov, Eseev, Aıapov, Qurmanǵazy men Klochkov kóshelerin sý basty. 200-den astam turǵyn úıdiń aýlasyna sý kirip, 21 úı sý astynda qaldy.
«Saǵat 19:00-degi jaǵdaı boıynsha, sý deńgeıi tómendedi. Atqarýshy organdar sý basqan úılerdi aralap, tekserip júr. Jaǵdaı baqylaýda. Zardap shekkender men mert bolǵandar joq»,-dedi vedomstvo ókili.
Oblystyq ákimdiktiń málimetteri boıynsha, kúnniń buzylyp, jeldiń kúsheıýine baılanysty birneshe aýyldyq okrýgte toq sónip qalǵan. Kommýnaldyq qyzmetter shaqyrtýlarǵa jedel shyǵyp jatyr. Qazirgi tańda Baıqadam aýyldyq okrýginiń Saýdakent aýylynda elektr qýaty qalpyna keltirilip jatyr.
Jańatas qalasyna TJD-nyń 43 qutqarýshysy keldi, 20-dan astam tehnıka jumyldyryldy. Oqıǵa ornynda oblystyq TJD bastyǵynyń orynbasary Rýslan Orynbekov, órt sóndirý jáne apattan qutqarý jumystary qyzmeti bastyǵynyń orynbasary Jeńis Baqbergenov, sondaı-aq polıtsııa men aýdandyq ákimdik ókilderi júr. Azamattyq qorǵanys qyzmetkerlerinen jedel shtab quryldy. TJD-da jedel shtab jumys istep jatyr.
