Jambyl oblysyndaǵy sarbaz ólimi: qylmystyq is qozǵaldy
ASTANA. KAZINFORM - QR Qorǵanys mınıstriniń tárbıe jáne ıdeologııalyq jumystar jónindegi orynbasary Asqar Mustabekov Jambyl oblysynda merzimdi áskerı qyzmettegi sarbazdyń qaza bolýyn tergeýge qatysty túsinik berdi.
- Bul jaǵdaıǵa baılanysty qylmystyq is qozǵalyp, tergeý amaldary júrip jatyr. Qorǵanys mınıstriniń buıryǵymen komıssııa qurylyp, ony Qorǵanys mınıstriniń orynbasary Shaıh-Hasan Jazyqbaev basqardy. Osy oraıda, oqıǵanyń mán-jaıy egjeı-tegjeıli tekserilip jatyr, - dedi Asqar Mustabekov Senatta tilshiler suraǵyna jaýap bere otyryp.
Ol bul iske qatysty tergeý jumystary Bas prokýror men Qorǵanys mınıstriniń jeke baqylaýynda turǵanyn aıtty.
Budan buryn habarlanǵandaı, QR Bas prokýratýrasy baspasóz qyzmetiniń málimetinshe, 27 qańtarda Jambyl oblysynda merzimdi áskerı qyzmettegi sarbaz qarýdy ustap júrgen kezde jaraqat alyp, kóz jumdy.
Osy oqıǵaǵa baılanysty Іshki ister mınıstrliginiń áskerı-tergeý organdary sotqa deıingi tergep-tekserýdi bastady.