Jambyl oblysyndaǵy naýqas ólimi: tergeý jalǵasyp jatyr

TARAZ. KAZINFORM – Taraz qalasynda 39 jastaǵy er adamnyń kóz jumǵany týraly habarlama áleýmettik jelide keńinen tarady.

Týystarynyń aıtýynsha, naýqastyń ólimine dárigerlerdiń gospıtalızatsııa úshin aqsha talap etkeni sebep bolǵan.

Aýrýhana qyzmetkerleri aldymen naýqasqa oryn joq ekenin aıtyp, gospıtalızatsııadan bas tartqan, keıin tek aqyly tekserýden keıin qabyldaǵan. Alaıda aýrýhanaǵa túskennen keıin onyń jaǵdaıy kúrt nasharlaǵan.

– Aýtopsııa kezinde ókpeden shamamen 1,5 lıtr suıyqtyq tabyldy, al dárigerler bastapqyda az ǵana mólsherde ekenin aıtqan edi. Tergeý shamamen bir jylǵa sozylyp keledi, – delingen jazbada.

Jambyl oblystyq densaýlyq saqtaý basqarmasynyń málimetinshe, naýqas 3 qańtar kúni Taraz qalalyq kópsalaly aýrýhanasyna «aýyr dárejeli qoǵamdastyqtan tys pnevmonııa» dıagnozymen túsken.

– Aýrý tarıhynan anyqtalǵandaı, naýqas úıde 10 kúnnen astam aýyryp, em qabyldamaǵan. Týystary men elektrondy densaýlyq pasporty derekteri boıynsha uzaq ýaqyt boıy alkogoldi ishimdik qoldanǵan, sońǵy 10 kúnde de ishimdik ishken, – dep málim etti vedomstvo.

Bul faktorlardyń saldarynan er adam qulap, kókirek tusynan jaraqat alyp, denesinde kóptegen kógerýlermen aýrýhanaǵa jetkizilgen. Dárigerler oǵan aýyr pnevmonııa men gıdrotoraks (ókpeqap qýysynda suıyqtyq jınalý) dıagnozyn qoıǵan.

– Naýqas shuǵyl túrde pýlmonologııa bólimine jatqyzylyp, barlyq qajetti emdeý sharalary men dárilerdi belgilengen hattamaǵa saı alǵan. Alaıda emdeý barysynda jaǵdaıy kúrt nasharlap, reanımatolog shaqyryldy. Keńeıtilgen júrek-ókpe reanımatsııasy júrgizildi, – delingen resmı aqparatta.

Barlyq sharalarǵa qaramastan, 6 qańtar kúni patsıenttiń bıologııalyq ólimi tirkelgen.

Qazir bul fakt boıynsha tergeý amaldary júrgizilýde.

– Tergeý merzimi eki aıdy quraıdy, qajet bolǵan jaǵdaıda prokýratýranyń kelisimimen úsh-tórt aıǵa uzartylýy múmkin. Dárigerge qatysty saraptamalar taǵaıyndaldy, qosymsha sot-medıtsınalyq komıssııa ótkizý josparlanyp otyr, – dedi Jambyl oblystyq polıtsııa departamenti bastyǵynyń orynbasary Baıjan Baıgeldi.

Eske salsaq, Jambyl oblysynda medıtsınalyq uıymdar 32,3 mlrd teńgeni tıimsiz jumsaǵany habarlandy.