Jambyl oblysynda jyl basynan beri 70-ten astam joǵalǵan jasóspirim tabylǵan

TARAZ. KAZINFORM – Jyl basynan beri Jambyl oblysynyń polıtseıleri «Lıder KZ» eriktilerimen birlesip, kámeletke tolmaǵan 77 jasóspirimdi izdestirip, olardyń 68-in sol kúni tapty.

Balalar men jasóspirimderdiń óz betinshe úılerinen ketýiniń negizgi sebepteri – ata-analarymen janjal jáne olardan qorqý, qańǵybastyq, balalardyń erkeligi men jaýapsyzdyǵy, kezbelik. Negizinen mektepte oqıtyn balalar úıden ketip qalyp jatatyn kórinedi. Úılerinen qashqandardyń 55 paıyzy qyzdar.

Búginde Jambyl oblysynyń polıtseılerimen birge 50-den astam erikti joǵalǵan adamdardy izdestirýde. Eriktilerdiń aıtýynsha, joǵalǵan eresek adamǵa qaraǵanda balany izdep tabý ońaıyraq. Ol úshin polıtsııa men eriktiler joǵalǵan adamnyń týystarymen sóılesip, onyń áleýmettik ortasyn, áleýmettik jelilerin zerttep, sol jerden alǵashqy izdeý sharalarynyń negizgi oryndaryn tańdaıdy. 

«Meniń tájirıbemde aıtarlyqtaı oryn alǵan oqıǵa, ol ata-analarymen urysyp, úıden ketip qalǵan 3 qyzdy tapqanymyz. Olardyń bári úıden qashyp ketken, sebebi anasy ony keshke otyrysqa jibermegen. Al qyzdar tósek jaımasyn paıdalanyp, úshinshi qabattyń terezesinen shyǵyp ketken. Biz polıtseılermen birge qyzdardyń jalǵa alǵan páterine bardyq. Olardy páterden syrtqa shyǵarý qıyn boldy. Áńgimelesýden keıin barlyǵy sátti aıaqtaldy. Tártip saqshylarynyń árdaıym jedel ári josparly túrde jumys isteıtinin atap ótkim keledi, bul birlesken izdeý jumystaryn aıtarlyqtaı jeńildetedi», – deıdi «Lıder KZ» eriktiler qozǵalysynyń jetekshisi Natalıa Afanaseva.

Buǵan deıin Jambyl oblysynda demalys bastalǵaly 236 jasóspirim polıtsııa bólimderine jetkizilgenin jazǵan bolatynbyz.