Jambyl oblysynda jasóspirimniń denesi tabyldy

TARAZ. KAZINFORM — Baızaq aýdany Sarykemer aýylynda stýdent kóz jumdy. Quqyq qorǵaý organdary tergeýdi bastady.

Polıtsııanyń dereginshe, jasóspirimniń ólimi boıynsha Baızaq aýdanynda qylmystyq is qozǵaldy.

— Qazirgi tańda istiń mán-jaıyn anyqtaý boıynsha tergeý júrip jatyr. Qylmystyq kodeksiniń 201-babyna sáıkes ózge málimetter jarııa etilmeıdi, — dep habarlady Jambyl oblysy PD.

Aıta ketelik buǵan deıin sáýir aıynda Jambyl aýdany, Tastóbe aýylynda da 15 jasar jasóspirim kóz jumǵan edi. Tergeý shamamen 4 aıǵa sozyldy, úsh kúdiktige qatysty materıaldar sotqa berildi.

Sonymen qatar, birneshe kúnniń ishinde Baızaq aýdanyna qarasty Túımekent jáne Dıhan aýyldarynyń jasóspirimderi men tarazdyq kámeletke tolmaǵan eki bala óz-ózine qol jumsady.

Kámeletke tolmaǵandar arasynda quqyq buzýdyń aldyn alý máseleleri jónindegi óńirlik keńeste oqý-aǵartý mınıstri Juldyz Súleımenovanyń júz mektepte psıhologııalyq-pedogogıkalyq, tárbıeleý jáne profılaktıkalyq sharalardy uıymdastyrý formaldy túrde júrgizilip jatqanyn atap ótti.

— Mektep josparlarynda olardyń naqty sharalary men bilim alýshylardyń qajettilikteri kórsetilmegen. Mektep ákimshiligi tarapynan erte anyqtalǵan daǵdarys jaǵdaılary kezinde tıisti vedomstvoaralyq ózara is-qımyl jolǵa qoıylmaǵan. Keıbir mektepterde «111» biryńǵaı baılanys ortalyǵynyń jumys istemeıtin QR-kodtary anyqtaldy. Óńirde bolǵan qaıǵyly oqıǵalardy taldaı otyryp, jekelegen mektepterde jaýapty qyzmetkerler balaǵa tıisti nazar aýdarmaǵanyn kórsetti. Sondyqtan mektep dırektorlary táýekel tobyndaǵy balalardy súıemeldeý nátıjeleri úshin jeke jaýap berýi tıis, — dedi mınıstr.

Juldyz Súleımenova ata-analardyń jaýapkershiligin kúsheıtý qajettigin de atap ótti. Resmı statıstıkaǵa sáıkes, óńirde kún saıyn 76 ata-ana balalaryn durys tárbıe bermegeni úshin ákimshilik jaýapkershilikke tartylsa, taǵy 395 ata-ana túnde balalardyń úıde bolýyn qadaǵalamaǵan.

Kamıla Múlik