Jambyl oblysynda meıramhana órtenip, 250 adam evakýatsııalandy

ASTANA. KAZINFORM – Jambyl oblysynda B.Momyshuly aýylynda ornalasqan 2 qabatty meıramhanadan órt shyqty, dep habarlaıdy QR Tótenshe jaǵdaılar mınıstrliginiń baspasóz qyzmeti.

Baspasóz qyzmetiniń málimetterine qaraǵanda, qutqarýshylar 250 adamdy evakýatsııalady. Naqtylanǵan málimetter boıynsha eki qabatty meıramhananyń shatyry janyp, 400 sharshy metr alańdaǵy 2-shi qabattyń shaǵyn zalyna kóshken. Oqıǵa ornynda TJD bastyǵynyń basqarýymen órt sóndirý shtaby quryldy.

Órt sóndirýge TJD jeke quramynan 60-qa jýyq adam, jedel qutqarý jasaǵy, apattyq medıtsına ortalyǵynyń ókilderi, psıhologtar jáne 12 tehnıka jumyldyryldy.

Órt saldarynan 4 adam medıtsınalyq kómekke júgingen. Onyń bireýi aýrýhanaǵa jatqyzylyp, kómirqyshqyl gazymen ýlanǵan úsh adam dárigerlerdiń baqylaýynda.

Órttiń sebebi anyqtalýda.