Jambyl oblysynda qant zaýyty salynady
ASTANA. KAZINFORM – Іshki naryq qajettiligin qamtamasyz etý maqsatynda Jambyl oblysy, Shý qalasynda jylyna 150 myń tonnaǵa deıin qant óndiretin joǵary tehnologııalyq zaýyttyń qurylysynyń jobasy ázirlenip jatyr.
Bul týraly Úkimet basshysy Oljas Bektenovtiń qant salasyn damytý máselesine qatysty joldanǵan depýtattyq saýal jaýabynda aıtylǵan.
- Merki qant zaýytynyń óndiristik qýatyn táýligine 3 myń tonnadan 4 myń tonnaǵa deıin ulǵaıtý jáne Taraz qant zaýytynda jańa tehnologııalyq jeli ornatý josparlanýda. 2026 jyldyń sońyna deıin Kóksý qant zaýytynyń qýaty táýligine 2,2 myń tonnadan 5 myń tonnaǵa deıin artady. Sonymen qatar, ishki naryqtyń qajettiligin qamtamasyz etý úshin qazir «Qazsugar CO» JShS Jambyl oblysy, Shý qalasynda jylyna 150 myń tonna qant óndiretin joǵary tehnologııalyq zaýyt salý jobasyn ázirleýde. Odan bólek Almaty oblysynda Al Khaleej Sugar kompanııasymen birlesken ınvestıtsııalyq jobany iske asyrý jaǵy qarastyrylyp jatyr, - delingen saýal jaýabynda.
Sondaı-aq Aýyl sharýashylyǵy mınıstrligi janyndaǵy alańda shaǵyn qýatty jobalarǵa ınvestıtsııa tartý múmkindigi qarastyrylmaq. Atalǵan sharaǵa aýyl sharýashylyǵy kooperatıvterin tartý jáne memlekettik qoldaý sharalaryn paıdalaný kózdelip otyr.
- Taraz qant zaýytyn jańǵyrtý boıynsha 2025–2026 jyldarǵa arnalǵan ınvestıtsııalyq baǵdarlama jasaldy. «Agrarlyq nesıe korporatsııasynyń» qoldaýymen jóndeý jumystarynyń birinshi kezeńi aıaqtaldy. Óndiristi jańǵyrtý zamanaýı tehnologııalardy engizýdi kózdeıdi, bul ónimdilikti arttyryp, shyǵyndardy azaıtýǵa jáne otandyq ónimniń básekege qabilettiligin nyǵaıtýǵa múmkindik beredi. Jeke ınvestıtsııalyq belsendilikti yntalandyrý úshin bıyldan bastap ınvestorlardyń shyǵyndaryn óteý normatıvi 25%-dan 40%-ǵa deıin artady. Bul ınvestıtsııalyq ahýaldy jaqsartýǵa jáne salaǵa qosymsha qarajat tartýǵa yqpal etedi, - deıdi Premer-mınıstr.
Úkimet basshysynyń málimetinshe, byltyr ýaqtyly qarjylandyrý men agrotehnıkalyq talaptardyń saqtalýynyń arqasynda josparlanǵan egis kólemi tolyq qamtamasyz etildi. Osylaısha qant qyzylshasynyń ónimdiligi eki ese artyp, rekordtyq kórsetkishke, ıaǵnı 1 268 myń tonnaǵa jetti.
Eske salsaq, byltyr Jambyl oblysyndaǵy Merki qant zaýytyndaǵy fermerler ósirgen qyzylshasyn ótkize almaı uzyn-sonar kezekke turǵan edi.
Aıta keteıik, jyl basynda belgili bolǵandaı Atyraýda Qytaı ınvestorynyń qarjysyna qant zaýyty salynýy múmkin.