Jambyl oblysynda Envida ai qarjy pıramıdasyna qatysty tergeý bastaldy
ASTANA. KAZINFORM — QMA Jambyl oblysy boıynsha departamenti «ENVIDA AI» qarjy pıramıdasyn qurý jáne oǵan jetekshilik etý faktisi boıynsha tergep-tekserý júrgizip jatyr.
Tergeý amaldaryna saı, joba uıymdastyrýshylary WhatsApp messendjeri arqyly «Envida ai ejednevnyı passıvnyı dohod» jáne «Envida ai sýper novyı proekt ejednevnyı passıvnyı dohod» ataýymen toptar quryp, azamattardy turaqty joǵary tabysqa ýáde berý arqyly tartqan.
Jobanyń marketıngtik modeli kópdeńgeıli júıege qurylǵan. Negizgi tabys jańa salymshylardy tartý esebinen qalyptasyp otyrǵan.
Joba ózin naqty aktıvterge ınvestıtsııa salatyn halyqaralyq ekojúıe retinde tanystyrǵan.
Nátıjesinde qarjy pıramıdasyna 370-ten astam salymshy tartylǵan.
Qatysýshylar geografııasy elimizdiń alty óńirin qamtıdy: Aqtóbe, Atyraý, Qyzylorda, Pavlodar, Túrkistan oblystary jáne Almaty qalasy.
Tergep-tekserý jalǵasyp jatyr.
Qazaqstan Respýblıkasy QPK-niń 201-babyna sáıkes ózge aqparat jarııalaýǵa jatpaıdy.
Aıta ketelik Shymkentte «Kapıtal» qarjy pıramıdasy anyqtalǵan edi.
