Jambyl oblysynda bir aýyl elektr energııasyn Qyrǵyzstannan qymbat tarıfpen alyp otyr
Búgin Senattyń jalpy otyrysynda depýtat Bekbolat Orynbekov Jambyl oblysyndaǵy birqatar strategııalyq nysandarǵa qarjy bólinbeı qalǵanyn aıtty, dep habarlaıdy QazAqparat tilshisi.
Onyń aıtýynsha, Jambyl oblysynyń ákimdigi «2024-2026 jyldarǵa arnalǵan respýblıkalyq bıýdjetti» qalyptastyrý aıasynda ortalyq memlekettik organdarǵa jalpy 129 mlrd teńgege 163 bıýdjettik ınvestıtsııalyq joba boıynsha ótinim bergen. Alaıda, birqatar mańyzdy salalar qarjylandyrylmaı qalǵan.
Depýtat Merki aýdanyndaǵy aýyldardy elektr energııasymen jabdyqtaý, sondaı-aq «Jaýǵash batyr» jáne «Qarataý» shekara zastavalaryndaǵy máselelerge erekshe nazar aýdardy. Aýyl turǵyndary Qyrǵyzstannan elektr qýatyn alýǵa jáne bul úshin joǵary tarıf boıynsha tóleýge májbúr.
«Jaýǵash batyr aýylynyń turǵyndary kórshiles Qyrǵyz Respýblıkasynan 1 kVt/saǵ úshin ortasha eseppen 90-100 teńge baǵamen elektr energııasymen qamtamasyz etilgen. Al oblys halqy úshin «Jambyl Jaryq Saýda-2030» tarıfiniń quny 1 kVt/saǵatyna 16 teńge. Bul aıyrmashylyq jergilikti halyqtyń narazylyn týdyryp otyr. Joba iske asqan jaǵdaıda Qyrǵyz Respýblıkasynan elektr energııasy boıynsha táýeldilikti joıýmen qatar, strategııalyq mańyzǵa ıe «Jaýǵash batyr» jáne «Qarataý» shekara beketterin elektr energııasymen jabdyqtaý máselesi oń sheshimin tabady», - dedi Bekbolat Orynbekov Úkimet basshysy Álıhan Smaıylovtyń atyna joldaǵan saýalynda.
