Jambyl oblysynda 5 mıllıard teńgeniń aktsızdik ónimderi tárkilendi

TARAZ. KAZINFORM – Jambyl oblysynda keıingi jeti aıda quny 5 mıllıard teńge bolatyn temeki ónimderi tárkilendi. 21 qylmystyq is tirkelip, 6 mln qoraptan astam temeki, 1 880 lıtr spırt jáne 600 bótelke kontrafaktilik araq zańsyz aınalymynan shyǵaryldy. 

Bul týraly Jambyl oblysy boıynsha ekonomıkalyq tergep-tekserý departamenti basshysynyń orynbasary Samat Qoıbaqov jýrnalıstermen ótken brıfıngide habarlady.

«Ótken jyldyń 12 aıymen salystyrar bolsaq, byltyr 23 qylmystyq is tirkelip, zańsyz aınalymnan quny 5 mlrd teńgeden astam ónim tárkilengen bolatyn. Onyń ishinde veıpter – 349 mln teńge, temeki – 4,7 mlrd teńgeni qurady. Sondaı-aq 6,5 mln qorap temeki jáne 174 myń veıp zańsyz aınalymnan shyǵarylǵan bolatyn. Osy baǵyttaǵy jumystar nátıjeli júrgizilip jatyr dep aıta alamyz. Sebebi bıylǵy 7 aıdyń jumys nátıjesi 2023 jyldyń qorytyndysymen shamalas», – dedi ol.

Aıta keteıik, buǵan deıin Jambyl oblysynda altyn urlaýmen jáne zańsyz óndirýmen aınalysqan qylmystyq top ustalǵanyn jazǵan edik.