Jambyl oblysynda 42 shetel azamaty Qazaqstannan shyǵaryldy
TARAZ. KAZINFORM – Jambyl oblystyq polıtsııa departamentiniń qyzmetkerleri oblys aýmaǵynda ýaqytsha ne turaqty bolatyn sheteldikterdi baqylaý boıynsha jumystar atqaryp jatyr.
Qoldanystaǵy kóshi-qon zańnamasy talaptarynyń biri – Qazaqstan Respýblıkasynda turaqty turýǵa ruqsat alǵan sheteldikterdi baqylaý. Osy maqsatta Qazaqstan aýmaǵynda 183 kúnnen artyq bolǵan sheteldikterge tekserý júrgizildi.
Nátıjesinde 52 sheteldiktiń buzýshylyq derekteri anyqtalyp, olardyń elimizde turaqty turýǵa berilgen ruqsat qaǵazdarynyń kúshi joıyldy. Endi bul sheteldik azamattar tegin medıtsınalyq kómek, zeınetaqy tólemderi jáne osy syndy tólemder men jeńildikterdi alý múmkindiginen aıyryldy.
«Jyl basynan beri kóshi-qon zańnamasyn buzǵany úshin sot sheshimimen respýblıka aýmaǵynan 42 shetel azamaty shyǵaryldy. Kóshi-qondy baqylaýdy júzege asyrý boıynsha júıeli jumystar jalǵasyn tabady», - delingen atalǵan departamenttiń baspasóz qyzmeti taratqan aqparatta.
