Jambyl oblysynan Atyraýǵa tehnıkalar jóneltile bastady
TARAZ. KAZINFORM – Jambyl óńirinen 107 tehnıka men onyń júrgizýshi-mehanıkteri Atyraý oblysyna kómekke attana bastady.
Sý tasqynynan zardap shekken óńirdiń biri – Atyraý oblysyna arnaıy tehnıkalardyń aldyńǵy legi, atap aıtqanda 20 tehnıka vagondarǵa tıelip, jóneltile bastady. Tehnıkalardyń qatarynda júk kólikteri, avtokran, tsısternalar, júk kótergishter bar.
«Josparlanǵan 107 tehnıkanyń búgin 20-syn temir jol platformasyna tıep jatyrmyz. Munda barlyǵy aranıy tehnıkalar. Qalǵan tehnıkalardy da birtindep jónelte beremiz. Tehnıkanyń júrgizýshileri jolaýshylar poıyzymen attanady.
Kólikter men mehanıkterimiz Atyraý halqyna qoldan kelgenshe kómek kórsetip, bári rettelip, qalypqa kelgen soń qaıtady», – dedi Jambyl oblystyq jolaýshylar kóligi jáne avtomobıl joldary bóliminiń basshysy Erbolat Seıtbek.
Buǵan deıin Sý tasqyny: 6 oblysta respýblıkalyq mańyzy bar 13 jol jabylǵanyn habarlaǵan bolatynbyz.
