Jaman ádetterge qalada turatyn tabysy kóp adamdar beıim keledi
ASTANA. KAZINFORM — Qoǵamdyq saıasat ınstıtýty saýalnamasyna jaýap bergen qazaqstandyqtardyń 52,7 paıyzy qutylǵysy keletin jaman ádetterdiń bar ekenin moıyndady.
Eń qyzyǵy ne? Jaman ádetin atap ótkenderdiń ishinde eń kóp taraǵany mynalar:
- Internetti shamadan tys kóp paıdalaný — 25,2%
- Fast-fýd jeý — 22,9%
- Energetık ishý — 20,5%
- Áleýmettik jeliler — 19,2%
- Kereksiz shoppıng — 18,5%
Statista agenttiginiń dereginshe, álemde adamdar kúnine orta eseppen 6 jarym saǵatyn ınternette ótkizedi, al qazaqstandyqtar jelide kúnine úsh saǵat otyrady.
Temeki shegý — áli kúnge deıin eń dástúrli jaman ádet sanalady, adamdardyń 23,9 paıyzy temekini tastaǵysy keledi.
8,3 paıyzy alkogolge táýeldilikten qutylýǵa asyq.
Qazaqstan DDU-nyń temekige qarsy kúres konventsııasyna qol qoıǵan el retinde jyl saıyn temeki ónimderin satýǵa jáne jarnamalaýǵa shekteý engizedi. Sońǵy sharalardyń biri — veıp ákelýge, satýǵa jáne taratýǵa tyıym salatyn zań.
Kim jaman ádetterge beıim?
- Qala turǵyndary (55,8%) jáne tabysy joǵary adamdar (67,5%).
- 25-35 jas toby (60,8%) aǵa býynǵa (32,6%) qaraǵanda jaman ádetterge jıi ushyraıdy.
- Nekedegi adamdardyń (50,1%) ajyrasqandarmen (70,8%) salystyrǵanda jaman ádetteri az bolady.
Qyzyqty faktiler:
— Er adamdar temekini tastaǵysy keledi (37,7%) jáne energetıkten bas tartqysy keledi (22,6%).
— Áıelder fast-fýdtan bas tartýǵa (27,7%) jáne ınternet paıdalaný ýaqytyn qysqartýǵa (27,6%) umtylady.
Ómir sapasyn jaqsartý úshin jaman ádetterdiń teris áserin moıyndaý jáne ózgeristerge umtylý mańyzdy.
Zertteý 2024 jyldyń shildesinde júrgizildi. Saýalnamaǵa 18 jastan asqan 2000 qazaqstandyq qatysty.
