Jalpy qylmystardyń 3% ǵana SQO-da jasalady – Іshki ister mınıstri

PETROPAVL. QazAqparat – Elde jasalǵan qylmystardyń tek 3 paıyzy Soltústik Qazaqstan oblysynda tirkelgen. Bul týraly óńir turǵyndarymen kezdesken QR Іshki ister mınıstri Marat Ahmetjanov aıtty, dep habarlaıdy QazAqparat tilshisi.

Marat Ahmetjanovtyń SQO turǵyndarymen eseptik kezdesýi Petropavldaǵy Jastar saraıynda ótti.

Vedomstvo basshysy ishki ister organdarynyń jumysy týraly habardar etip, reformalarǵa toqtaldy.

«Memleket basshysy aýqymdy reformalardy bastady. Ondaǵy basty mindet jańa – Ádiletti Qazaqstandy qurý. Dál qazir halyqtyń suranysy men bıliktiń nıeti barynsha sáıkes kelip turǵan kezeń. Sondyqtan memlekettik basqarý modeli men qoǵamdyq damý baǵyty ózgerip jatyr. Jańa saıası mádenıet qalyptasýda. Memleket pen qoǵam arasynda ashyq jáne tyǵyz qarym-qatynas modeli qurylyp jatyr. Osyǵan baılanysty mınıstrler halyqpen jıi kezdesetin bolady. Maqsat – ár óńirge baryp problemalyq máselelerdi anyqtap, olardy sheshý joldaryn qarastyrý. Osylaısha «Halyq únine qulaq asatyn memleket» kontseptsııasyn júzege asyrý», - dedi Marat Ahmetjanov.

Mınıstrdiń aıtýynsha, 30 jylda elimizde krımınogendik jaǵdaı jaqsarǵan. Kisi óltirý respýblıka boıynsha 2 625-ten 764-ke deıin – 3,5 ese tómendegen. Densaýlyqqa aýyr zııan keltirý 2 esege, qaraqshylyq 6,5 esege, zorlaý 3 esege, tonaý 4 esege, buzaqylyq 3,5 esege azaıǵan.

SQO-da krımınogendik jaǵdaı turaqty. Elde tirkeletin qylmystardyń tek 3% ǵana óńir úlesinde.

«Jyl basynan oblysta 3 124 qylmys tirkelgen. Bul ótken jylmen salystyrǵanda 6% az. SQO-da ár 10 myń adamǵa ortasha 35 qylmystan keledi. Bul respýblıkalyq kórsetkishten eki ese tómen. Bul kúndelikti aýqymdy jumystyń nátıjesi», - dedi Marat Ahmetjanov.