Jalǵan medıtsınalyq qujat jasaǵandarǵa jaza qatańdatylmaq

NUR-SULTAN. QazAqparat – Ótken jyldyń naýryz aıynan beri elimizde turǵyndardy koronavırýs ınfektsııasyna qarsy vaktsınatsııalaý naýqany júrgizilip jatqany belgili. Vaktsınanyń 2 dozasyn da alǵan adamdarǵa vaktsınatsııa pasporty beriledi. Dál osy pasporty bar adamdar ákimshilik ǵımarattarǵa, senbi-jeksenbi kúnderi saýda oıyn-saýyq ortalyqtaryna emin-erkin kirip-shyǵý múmkindigine ıe. Sondyqtan da sońǵy ýaqytta vaktsına saldyrmastan jalǵan vaktsınatsııa pasportyn jasatýshylar jaıyndaǵy derekter de belgili bolyp jatyr. Dál sol azamattar jalǵan qujat jasatý arqyly tek ózine, jaqyndaryna ǵana emes qoǵamǵa da úlken qaýip tóndiretindigin sezinbeı jatqan sııaqty. Al jalǵan pasport jasap berip júrgen medıtsına qyzmetkerleri jeńil jolmen kelgen aqshadan aıyrylyp qalmaý úshin ardan attap otyrǵany anyq.

Jalpy, jalǵan vaktsına pasporttary men PTR-anyqtamasyn daıyndaý jáne satýmen aınalysatyn adamdardy anyqtaý maqsatynda Іshki ister mınıstrliginiń jaýapty qurylymdyq bólinisteri tıisti jumystardy únemi júrgizip keledi. Jalǵan qujattardy satý boıynsha berilgen habarlandyrýlardy anyqtaý úshin ınternet jelisine, áleýmettik jelilerge jáne messendjerlerge monıtorıng júrgizip otyrady. Nátıjesinde jyl basynan beri ishki ister organdary osy salada barlyǵy 321 is tirkedi. Onyń ishinde PTR-testi qoldan jasaý boıynsha – 114 fakt, vaktsına pasporttaryn qoldan jasaý boıynsha 207 fakt bar.

Máselen, osy jyldyń shilde aıynda jedel-izdestirý is-sharalary barysynda Pavlodar oblysynyń quqyq qorǵaý organdary vaktsına pasportyn qoldan jasady degen kúdikpen Pavlodar qalasy emhanalarynyń biriniń medıtsına qyzmetkerlerin anyqtap, ustaǵan bolatyn. Ótken aıda ǵana dál osy qaladaǵy taǵy bir emhananyń medbıkesi koronavırýs ınfektsııasyna qarsy jalǵan vaktsınatsııa pasporttaryn jasap, birneshe ret azamattardan jalpy somasy 160 myń teńge aqshalaı syıaqy alǵan úshin qolǵa túskeni belgili.

Al mundaı keleńsizdiktiń aldyn alý úshin qandaı is-sharalar qabyldanbaq? Jalǵan vatsınatsııa pasportyn jasaǵandarǵa da, jasatqandarǵa da qandaı jaza qoldanylmaq? Osy saýaldardy QR ІІM Krımıaldyq polıtsııa departamentiniń Kıberqylmyspen kúres ortalyǵy bastyǵynyń orynbasary Rústem Dúısetaevqa qoıǵan edik.

«Іshki ister mınıstrligi epıdemıologııalyq ahýaldy jaqsartý maqsatynda PTR-testilerin qoldan jasaý jáne blankterin satý, sonymen qatar jalǵan vaktsınatsııa pasporttaryn ázirleý faktilerin anyqtaý boıynsha is-sharalar júrgizilip keledi. Mundaı faktilerdiń jolyn kesý úshin Іshki ister mınıstrligi janynan múddeli memlekettik organdardyń, atap aıtqanda Ulttyq qaýipsizdik komıtetiniń, Bas prokýratýranyń, Qarjylyq monıtorıng agenttiginiń, Densaýlyq saqtaý, Aqparat jáne qoǵamdyq damý mınıstrlikteriniń ókilderi bar vedomstvoaralyq arnaýly top quryldy. Jalǵan vatsınatsııa pasporty men PTR-test nátıjesin daıyndaý jáne taratý faktileriniń aldyn alý jáne tergeý jónindegi memlekettik organdardyń is-qımyl algorıtmi ázirlendi. ІІM men onyń aýmaqtyq bólimshelerinde Internet jelisinde, onyń ishinde áleýmettik jeliler men messendjerlerde jalǵan qujattar satý jarnamalaryn anyqtaýǵa baǵyttalǵan turaqty monıtorıng toptary jumys isteıdi. Monıtorıng nátıjesinde sheteldik tehnıkalyq alańdardan ornalastyrylǵan 142 jarnama anyqtaldy. Olarǵa qatysty aqparattar buǵattaý úshin Aqparat jáne qoǵamdyq damý mınıstrligine jiberildi», - dedi Rústem Dúısetaev.

Onyń atap ótýinshe, quqyq qorǵaý organdary qyzyǵýshylyq týdyrǵan faktilerge jáne olarǵa qatysty bar tulǵalarǵa qatysty aqparattardy jınaý jáne tekserý is-sharalaryn turaqty júrgizip otyrady. Mundaı faktiler anyqtalǵan jaǵdaıda QR Qylmystyq kodeksiniń «Medıtsına qujattaryn qoldan jasaý jáne paıdalaný» 385-babymen jáne «Zańsyz syıaqy alý» 247-babymen sotqa deıingi tergeý amaldary júrgiziledi. Іshki ister organdary júrgizgen jumystardyń nátıjesinde sotqa 62 is jiberildi. Onyń 33-i PTR-anyqtamaǵa, al 29-y vaktsınatsııa pasportyna qatysty. Munan bólek 140 qylmystyq is boıynsha tergeý amaldary júrgizilip jatyr.

Aıta keterligi, mundaı quqyq buzýshylyqtar úshin QR Qylmystyq kodeksiniń 385-babynda jalǵan qujat jasaǵandarǵa 4 jylǵa deıin bas bostandyǵynan aıyrý túrindegi qylmystyq jaýapkershilik, al ony paıdalanǵany úshin 40 táýlikke deıin qamaýǵa alý qarastyrylǵan. Degenmen, aldaǵy ýaqytta mundaı qylmys jasaǵandarǵa jazany qatańdatý máselesi de qarastyrylyp jatyr.

«Tolyqtaı alǵanda, memlekettik organdar júrgizip otyrǵan jumystardyń nátıjesinde jalǵan medıtsınalyq qujattardy daıyndaý jáne paıdalanýmen qatysty jasalatyn quqyq buzýshylyqtardyń sany osy jyldyń shildesinen bastap 13 qarashaǵa deıin 94 faktige qysqaryp otyr. Buǵan qosa, Bas prokýratýra janyndaǵy Qylmystyq kodeks pen Qylmystyq protsessýaldyq kodeksti qoldaný tájirıbesin monıtorıngileý jáne jınaqtaý vedomstvoaralyq jumys toby jalǵan vaktsınatsııa pasportyn daıyndaý jáne taratýǵa jazany qatańdatýdyń nátıjeliligi máselesin qarastyryp jatyr. Onda zańsyz syıaqy alǵany úshin jaýapkershilikti kúsheıtýge, sonymen qatar belgili bir laýazymmen aınalysý quqyǵynan aıyrýǵa qatysty is-sharalar bar», - dedi ortalyq bastyǵynyń orynbasary.