Jalǵan aqparattar qyzylordalyq kásiporyndar jumysyna kedergi keltirdi

QYZYLORDA. QazAqparat - Qyzylorda oblysynda jergilikti ónimderge qatysty taralǵan shyndyqqa janaspaıtyn aqparat kásiporyndardyń jumysyna kedergi keltirdi, dep habarlaıdy QazAqparat tilshisi.

Mundaı jalǵan habarlar áleýmettik jeli arqyly taratylǵan. Odan zııan shekken kompanııalar qatarynda tuz óndiretin «Araltuz» AQ men kúrish ónimin shyǵaratyn «Baıdala» JShS bar. Áleýmettik jeli arqyly taratylǵan jalǵan aqparatta tuz sapasynyń tómendegeni aıtylǵan. Al onda «Baıdalanyń» kúrishine qatysty «ónim sapasyz» degen sarynda beınematerıal taratylǵan.

Osyǵan oraı kompanııa basshylary turǵyndardyń alańdaýyna eshqandaı negiz joq ekenin alǵa tartady. Olardyń ónimderi burynǵy sapasynan tómendegen emes.

«Bizdiń ónimniń sapasy kún saıyn tıisti organdar tarapynan tekserilip otyrady. Sapasyn óte qatań qadaǵalaımyz. Aıta keterligi, «Araltuz» ónimderiniń úshten ekisi shetelge eksportqa shyǵarylady. Bizdiń ónimderimizdi alatyn elder sapa máselesine basa nazar aýdarady», - dedi «Araltuz» AQ vıtse-prezıdenti Evgenıı Korol.

Kúrish óndirýmen aınalysatyn «Baıdala» JShS shyǵaratyn ónimniń sapasy da qalypty. Ol jóninde «Qazaqstan agrarlyq saraptamasy» AQ Qyzylorda fılıalynyń basshysy Meırambek Serikbaı aıtyp ótti.

«Bizdiń oblysta zaýytta óndiriletin jáne eksportqa shyǵarylatyn kúrishter úsh tekserýden ótedi. Olar - sáıkestik, karantındik jáne sapa sertıfıkaty. Oblys dıqandary elimiz tutynatyn kúrishtiń 80 paıyzyn óndiredi. Buryn bizdiń aımaqta óndiriletin kúrishtiń 20-30 paıyzy ǵana eksportqa shyǵatyn, qazir ol birshama artty. Kompanııanyń kúrishi - sapaly, halyq tutynyp joǵary baǵasyn alyp júrgen, eksportta suranysqa ıe ónim», - dedi Meırambek Serikbaı.

Eki kompanııaǵa qatysty jaǵdaı «Atameken» UKP, jergilikti atqarýshy organdar, sondaı-aq Іshki ister organdary baqylaýyna alynǵan. Kásipkerlerge jan-jaqty kómek kórsetilýde.