Jalǵa beriletin baspana: bıyl 14,5 myń páter satyp alynbaq

ASTANA. KAZINFORM - Ónerkásip jáne qurylys vıtse-mınıstri Qýandyq Qajkenov halyqtyń áleýmettik turǵydan álsiz toby sanatyndaǵylardy arendalyq baspanamen qamtamasyz etýge qatysty túsinik berdi.

- Turǵyn úı-kommýnaldyq ınfraqurylymdy damytýdyń 2023 – 2029 jyldarǵa arnalǵan tujyrymdamasyna sáıkes, 2029 jylǵa deıin jyl saıyn kezekte turǵan shamamen 10 myń adamdy jalǵa beriletin baspanamen qamtamasyz etý eskerilgen. 2024 jyly 21 045 adamǵa jalǵa beriletin turǵyn úı berildi, oǵan 334,9 mlrd teńge bólindi. Bıyl 14 556 páter satyp alýǵa 222,4 mlrd teńge qarastyryldy. Osy jyldyń 11 aıynyń qorytyndysy boıynsha 7 223 turǵynǵa jalǵa beriletin baspana berildi, - dedi Q. Qajkenov Májilis janyndaǵy Qoǵamdyq palata otyrysynda.

Sonymen qatar ol qazir jeńildikpen ıpotekalyq baǵdarlamalar júzege asyrylyp jatqanyn eske saldy. Kezekte turǵandar «Otbasy banki» arqyly 2% jáne 5% jeńildikti mólsherlememen ıpoteka ala alady.

- 2025 jyldyń 1 jeltoqsanyndaǵy jaǵdaı boıynsha kezekte turǵan 4954 adam jeńildikpen nesıe berý tetigi arqyly turǵyn úı aldy. Munymen qosa, turǵyndarǵa alǵashqy jarnanyń bir bóligin jabý úshin turǵyn úı sertıfıkattary beriledi. Onyń eń joǵary somasy - 1,5 mln teńge. Bul mehanızm jergilikti bıýdjet esebinen qarjylandyrylady. Osy jyldyń 11 aıynyń qorytyndysy boıynsha jalpy somasy 1,7 mlrd teńgege 1486 turǵyn úı sertıfıkaty berildi, - dedi vıtse-mınıstr.

Budan buryn habarlanǵandaı, bıyl elde jalpy 20 mln sharshy metrge tarta baspana tapsyrylmaq.