Jalaqy tólenbeıdi: Qazaqstan Halyq keńesiniń músheleri qoǵamdyq negizde jumys isteıdi
ASTANA.KAZINFORM – Qazaqstan Halyq keńesiniń músheleri qoǵamdyq negizde jumys isteıdi. Bul týraly búgin Májilis depýtaty Erlan Saırov málim etti.
Atap aıtqanda, búgin Parlament palatalarynyń birlesken otyrysynda birinshi oqylymda maquldanǵan zań jobasynda Qazaqstan Halyq Keńesiniń quramyn qalyptastyrý máselelerine erekshe nazar aýdarylǵan. Qujatta qoǵamnyń negizgi toptary – etnomádenı birlestikterdiń, qoǵamdyq birlestikter men kommertsııalyq emes uıymdardyń, sondaı-aq máslıhattar men qoǵamdyq keńesterdiń teń dárejedegi ókildigi kózdeledi. Bul rette Qazaqstan Halyq Keńesiniń quramy atalǵan toptardyń usynymdaryn eskere otyryp, 42 músheden teń dárejede qalyptastyrylatyn bolady, ıaǵnı jalpy músheleri 126 adamnan turady. Mundaı tásil ártúrli qoǵamdyq múddelerdi eskerýge jáne ortaq kelisilgen ustanymdy qalyptastyrýǵa múmkindik beredi.
Osy oraıda Erlan Saırov Halyq keńesi músheleriniń basym bóligi ár óńirdiń ókilderinen quralatynyn eske saldy. Sondyqtan oblystardaǵy turǵyndar óziniń áleýmettik, ekonomıkalyq jáne basqa da problemalaryn aıtý úshin sol óńirdegi keńes múshelerine júgine alady.
- Qazaqstan Halyq Keńesi keminde jylyna bir ret shaqyrylatyn Qazaqstan Halyq Keńesiniń Sessııasy jáne Qazaqstan Halyq Keńesiniń Tóralqasynan turady. Onyń músheleri sessııaǵa óńirlerden elordaǵa shaqyrtylady. Halyq keńesinde jalpy 126 adam bolady. Olarǵa jalaqy tólenbeıdi, ıaǵnı tek qoǵamdyq negizde jumys isteıdi, - dedi E.Saırov Parlament palatalarynyń birlesken otyrysy aıasynda ótken brıfıngide.
Sonymen qatar depýtat keńestiń qyzmetin uıymdastyrý baǵytynda jumys isteıtin tıisti Hatshylyq qurylatynyn jáne ol memlekettik organ retinde qyzmet etetinin eske saldy. Bul turǵyda hatshylyq qyzmetkerleriniń jalaqysy bıýdjetten qarjylandyrylady.
Aıta keteıik, Keńestiń qyzmetin uıymdastyrýshylyq jáne taldamalyq turǵydan qamtamasyz etýdi Hatshylyq júzege asyrady. Ol memlekettik organ retinde qurylady.
Ádilet mınıstri Erlan Sársembaevtyń aıtýynsha, Halyq keńesi memlekettik organdardyń qyzmetin almastyrmaıdy jáne olardyń fýnktsııalaryn qaıtalamaıdy.
Tıisti konstıtýtsııalyq zań jobasynyń mańyzdy bóligi Qazaqstan Halyq Keńesiniń ókilettikterine arnalǵan. Olardyń qataryna ishki saıasat máseleleri boıynsha usynystar ázirleý, zańnamalyq bastama jasaý quqyǵy arqyly zań shyǵarý protsesine qatysý, referendým ótkizý jóninde bastamalar kóterý, qoǵamdyq talqylaýlar men dıalog alańdaryn uıymdastyrý, sondaı-aq qoǵamdyq baqylaýǵa qatysý kiredi.
Budan buryn habarlanǵandaı, birlesken otyrysta depýtattar «Qazaqstan Halyq Keńesi týraly», «Qazaqstan Respýblıkasy astanasynyń mártebesi týraly», «Qazaqstan Respýblıkasynyń ákimshilik-aýmaqtyq qurylysy týraly» úsh konstıtýtsııalyq zań jobasyn birinshi oqylymda talqylap jatyr.
