Jaqyp Asanov ózi basqaryp otyrǵan prokýratýranyń basty kemshilikterin jaıyp saldy
«Bizdiń zańdarymyzda prokýratýranyń naqty quzyreti aıqyndalmaǵan, ıaǵnı jumys aýqymy men onyń shegi naqtylanbaǵan. Kez kelgen salanyń óziniń tártibi bar jáne olar soǵan táýeldi. Árbir mınıstrliktiń, memlekettiń organnyń jaýapty salasy bar, óziniń baǵytynda zańdylyqty qamtamasyz etedi. Al prokýratýra bolsa, solardy qaıtalaımyn dep, jaǵalasyp, olardyń jumysyna aralasa beremiz. Kimdi tekseremiz desek te, óz erkimiz. Shynyn aıtsaq, biz aralaspaıtyn jer qalmady. Osynyń kesirinen halqymyzdyń janyna batyp, kóńiline tıip júrgen máselelerdi shetkeri qaldyrdyq. Nege? Óıtkeni ýaqytymyz joq deımiz, bizde jalpy qadaǵalaý bar, ıaǵnı bıznesti jáne memlekettik organdardy tekserýimiz kerek dep solaı qaraı aýyp ketkenbiz. Al qylmystyq protsess óz betinshe qaldy», - dep toqtaldy Bas prokýror «Prokýratýra týraly» zań jobasyn tanystyrý barysynda.
Osy oraıda ol elimizde 60-qa jýyq baqylaýshy ári tekserý organdar ekenin, degenmen olardyń jumysyn da prokýratora ózine ilip alǵanyn synǵa aldy.
«Bul organdar da bul úrdiske úırenip ketti. Olar qıt etse boldy jaýapkershilikten qashyp, prokýratýraǵa baryńyz deıdi.Prokýratýraǵa da bul yńǵaıly, ıaǵnı qalasa tekseredi nemese basqalarǵa ysyra salady. Munyń barlyǵy jemqorlyqqa aparatyn týra jol. Jalpy, kez kelgen problemany sheshetin, búkil aryzdardy qaraıtyn bir ámbebap organ bolý múmkin emes. Mundaı eshbir elde de joq. Biz bolsaq qadaǵalaýshy organbyz dep barlyǵyn úıretip aldyq, biraq qatysy bar ma, joq pa oǵan qaramadyq», - dedi Asanov.
Onyń sózine qaraǵanda, byltyrdyń ózinde prokýratýraǵa 350 myń aryz túsken, osy oraıda bunyń barlyǵyn qamtýda tıisti sapa bolmaıdy.
Aıta keteıik, atalǵan zań jobasynda joǵary qadaǵalaýdyń shekteri men nysandary aıqyndalǵan, onyń negizgi baǵyttary naqtylanǵan, memlekettik organdar men kásipkerlik sýbektiler qyzmetiniń zańdylyǵyn saqtaý úshin joǵary qadaǵalaýdyń shekaralary belgilendi.
