Jaqsy bolashaq ǵylymnyń enshisinde - Úzdik jas pedagog

ALMATY. QazAqparat – Jaqynda ál-Farabı atyndaǵy Qazaq ulttyq ýnıversıtetiniń oqytýshysy Shyńǵys Nurǵazy elimizdiń Úzdik jas pedagogy atandy. Ol ǵylymı-zertteý jumystarymen belsendi túrde aınalysyp keledi. 28 jastaǵy mamannyń aıtýynsha, ustaz kópjaqty, bilimdi, eń bastysy óz mamandyǵyn jaqsy kórýi kerek. Sondaı-aq, qazir Qazaqstanda bilim men ǵylymdy damytýǵa kóp kóńil bólinýde dep sanaıdy.

Shyńǵys Nurǵazy - Ekonomıka jáne bıznes joǵary mektebi fakýltetiniń ekonomıka kafedrasynyń aǵa oqytýshysy. Ǵylymı qyzmetpen belsendi túrde aınalysýda, fılosofııa doktory (PhD) ǵylymı dárejesine úmitker, Tsýkýba (Japonııa) jáne Granada (Ispanııa) ýnıversıtetteri baǵdarlamalarynyń shákirtaqy ıegeri. Onyń maqalalary eń kóp oqylymmen ǵylymı jýrnaldarda jarııalandy. Ol sondaı-aq Germanııa, Italııa jáne Lıtvada ǵylymı taǵylymdamadan ótken ustaz.

«Ary qaraı damý, oqý jáne oqytý úshin men ǵylym jáne zertteýmen aınalysa bastadym. Ustaz bolý ońaı emes. Ýnıversıtettiń oqytýshysy bolý úshin kem degende magıstr dárejesi bolý kerek, alaıda, ary qaraı mánsaptyq ósý úshin PhD doktor bolý jáne úlken motıvatsııa kerek. Ustazdyq qyzmette basqa salalardaǵy sekildi óz qıyndyqtary bolady. Biraq, menińshe eger adam óziniń súıikti isimen aınalyssa, onda kezdesetin qıyndyqtardy tájirıbe retinde qarap, olardy ońaı jeńedi», - deıdi Shyńǵys Nurǵazy.

Ol qazir qoǵamnyń bilim men pedagogıkaǵa degen qarym-qatynasy jaqsy damyp kele jatqanyn atap ótti.

«Qazirgi tańda ustazdarǵa kóńil bólinip keledi. Bul jaqsy úrdis jáne ustazdarǵa degen qurmetti kórsetedi. Elimizde bilim berý kontentin qalyptastyrý degenimiz - sapaly bilim men jarqyn bolashaqtyń negizi. Biz sheteldiń tájirıbesin alyp, odan bizdiń qoǵam úshin eń qajetti dúnıelerdi alýǵa tyrysamyz. Elimizde joǵary bilimniń sapasy artýda, ýnıversıtetterge akademııalyq is-qımyl erkindigi beriledi jáne JOO-lardyń materıaldyq-tehnıkalyq bazasy ulǵaıýda. Sondaı-aq, búginde ǵylymı salany damytý, onyń nátıjeliligin arttyrý memlekettiń birinshi kezektegi jáne ózekti mindetteriniń qataryna kiredi. Bul biz úshin úlken qoldaý. Jaqsy bolashaq ǵylym men sapaly bilimniń enshisinde dep oılaımyn»,- dedi ol.

Jas ustaz sondaı-aq qalaısha elimizdiń úzdik pedagogy atanǵanyn aıtty.

«Men «Úzdik jas pedagog - 2022» baıqaýyna ótinimder qabyldaý bastalǵanyn estidim. Oǵan qujattarymdy tapsyramyn dep sheshtim. Bul protsess jeńil boldy, ıaǵnı, esse jazyp, sońǵy bes jyldaǵy jetistikterińdi kórsetý qajet boldy. Ol kezde baıqaýdy uıymdastyrýshylarǵa respýblıkanyń joǵary oqý oryndary, arnaýly orta oqý oryndary, jalpy bilim berý jáne basqa da bilim berý uıymdarynan 4 myńnan astam ótinim tústi. Meniń kandıdatýram «Úzdik jas pedagog - 2022» ataǵyna laıyq bolyp, osy ataqty alýǵa maquldandy«, - dedi Shyńǵys Nurǵazy.

Sóz sońynda ol barlyq áriptesterin búgingi «Ustazdar kúni» merekesimen quttyqtap, olarǵa eńbekterine sáttilik, shyǵarmashylyq tabys pen shabyt tiledi.

Aıta keteıik, Qazaqstanda «Ustazdar kúni» jyl saıyn qazan aıynyń alǵashqy jeksenbisinde atalyp ótedi.