«Jaqsy adamdarym»: Jurtshylyqtyń ystyq yqylasyna bólengen otandastarymyz marapattaldy
Búgin elordadaǵy Beıbitshilik jáne kelisim saraıynda «Jaqsy adam-2023» arnaıy syılyǵynyń saltanatty marapattaý rásimi ótti. Prezıdent Teleradıokeshenine qarasty «Jibek joly» telearnasynyń uıymdastyrýymen ótken dástúrli is-shara bıyl ekinshi ret uıymdastyryldy, dep habarlaıdy Kazinform.
«Jibek joly» telearnasy kórermenderdiń kózaıymyna aınalǵan «Jaqsy adamdarym» baǵdarlamasynyń osy jylǵy qorytyndysyn shyǵaryp, el ishinde erligimen, erekshe qasıetimen, qaısarlyǵymen, bilimimen tanylǵan naǵyz talant ıelerin, myqty mamandar men búgingi kúnniń batyrlaryn marapattady. Bıyl dástúrli is-sharada bilim, ǵylym, medıtsına, sport jáne qutqarý qyzmeti boıynsha 7 adamǵa arnaıy syılyq tapsyryldy. Olarǵa «Jaqsy adam-2023» arnaıy syılyǵynyń dıplomy men músinshesi jáne 1 000 000 teńge qarjylaı syılyq berildi. «Jobaǵa «Altyn Qyran Foundation» qoǵamdyq qory qoldaý kórsetip, qarjylaı demeýshilik tanytty.
Sonymen «Jibek joly» telearnasy «Jaqsy adamdarym» baǵdarlamasy marapattaǵan jaqsy adamdarymyzben tanys bolyńyzdar!
Qurysh deneli, bolat minezdi Arman
Arman Aıqynbekov. Aqmola oblysy Qabanbaı batyr aýylynyń turǵyny. №34 órt sóndirý beketiniń órt sóndirýshi-qutqarýshysy. Sheni - serjant. Jaqynda áleýmettik jelide onyń arystan júrekti azamat ekenin aıǵaqtaıtyn vıdeo tarady. Áriptesteri túsirgen beıneden Armannyń muz qursanyp júrip, óz qyzmetin aıaǵyna deıin adal atqarǵanyn kóremiz. Bul oqıǵa 11 jeltoqsan kúni tańǵy saǵat 7 jarym shamasynda Qosshy qalasynda bolǵan. Aýdany 290 sharshy metrlik ekiqabatty turǵyn úıdi ot sharpıdy. Sol kúnderi Arqanyń aıazy 40 gradýsqa deıin jetip, aqyryp turǵan edi. Qolaısyz aýa raıyna qaramastan, órt sóndirýshiler alty saǵat boıy tilsiz jaýmen arpalysady. Qyzyl jalynǵa shashqan sýdan Armannyń ústi-basy muz bolyp qatyp qalǵan. Sońynda ol kıimin ózi sheshe almaı, áriptesteriniń kómegine júginedi.
Borysh pen bolmys - Nursultan
Nursultan Temirbolat. Astana qalasy PD Jedel qımyldaıtyn arnaıy jasaǵy Arnaıy motorlanǵan bóliminiń ınspektory. Polıtsııa aǵa leıtenanty. Ol polıtsııa qyzmetkeriniń jumys babynda ǵana emes, jumystan tys ýaqytta da el qorǵany bolý kerektigin áreketimen áıgilegen azamat. Nursultan kóligimen ketip bara jatyp, Bolashaq kóshesiniń boıynda alabaı ıttiń balabaqsha balalaryna qaraı umtylǵanyn baıqap qalady. Sol mezette ol kóliginen atyp shyǵyp, qabaǵan ıttiń sońynan júgiredi. Qolyna ilikken kesek taspen ony qaımyqtyryp, sol mańaıda turǵan traktordyń qasyna qýalap ákelgen. Azýyn kórsetken alabaıdy eshqaıda jibermeı qaqpaqaılap ustap, polıtsııaǵa qońyraý soǵady. Kóp uzamaı oqıǵa ornyna jergilikti ýchaskelik polıtsııa ınspektory men ıt aýlaıtyndar keledi. Sóıtip, ol balalardy úlken qaýipten qutqaryp qalǵan.
Adam janynyń arashasy - Erbol
Erbol Mahambetov. Ulttyq neırohırýrgııa ortalyǵy Tamyrly jáne fýnktsıonaldy neırohırýrgııa bólimshesiniń meńgerýshisi. Medıtsına ǵylymdarynyń kandıdaty. Onyń otandyq medıtsınaǵa ákelgen jańalyǵy kóp. Ol elimizdegi neırohırýrgııanyń klınıkalyq praktıkasyna asa kúrdeli aýrýlardy emdeýdiń ınnovatsııalyq tásilin engizdi. Ol elimizde alǵash ret mıdyń arterııa-venalyq malformatsııasy sııaqty patologııany mıkrohırýrgııa ádisimen emdedi. Nátıjesinde júzdegen adamdy ınsýlttan aman alyp qaldy. Ol elimizdiń densaýlyq saqtaý júıesindegi klınıkalyq tájirıbege úshkil jáne tiljutqynshaq nervteriniń nevralgııasy kezinde bettiń aýrýyn hırýrgııalyq emdeýdiń qazirgi zamanǵy tetikterin engizdi. Sonyń arqasynda kúrdeli mı aýrýlaryna shaldyqqan otandastarymyz burynǵydaı shetelde emes, óz elimizde emdelýge múmkindik aldy. Qazirgi kezde bul emdeý ádisi Qazaqstannyń kóptegen neırohırýrgııalyq klınıkasynda qoldanylady.
Batyrlyq bilekte emes, júrekte!
Aqjol Geroı. Almaty oblysy Іle aýdanynyń turǵyny. №24 lıtseıdiń 8-synyp oqýshysy. Kópbalaly otbasynyń tuńǵyshy. Ózinen keıin alty baýyry bar. Ata-ájesiniń ónegesin, áke-sheshesiniń tárbıesin kórip ósip kele jatqan úlgili bala. Jaqynda ol atyna zaty saı ekenin kúlli jurtqa pash etti. Aqjol kúndelikti qatynaıtyn №219 avtobýspen mektepten úıine qaıtyp kele jatqan. Sońǵy aıaldamaǵa jaqyndaǵanda abyr-sabyr bastalady. Avtobýs shaıqap ala jóneledi de, joldan shyǵyp, turǵyn úıge qaraı baǵyt alǵan. Bul kezde Aqjol qoǵamdyq kóliktiń artqy jaǵynda turǵan, dereý aldyna qaraı umtylady. Barsa, avtobýs júrgizýshisi esin joǵaltyp, talyp qalǵan eken. Al avtobýs turǵyn úıge soǵylýǵa jaqyn qalǵan. Óziniń ǵana emes, barlyq jolaýshynyń ómirine qaýip tóngenin túsingen jetkinshek oılanbastan avtobýs róline jarmasyp, ony toqtatyp úlgeredi. Sóıtip qanshama adamnyń ómirin saqtap qaldy.
Janashyr jan
Mereke Edresov. 35 jasta. Qurylysshy bolyp jumys isteıdi. Onyń muz jarylyp, ózenge túsip ketken 17 jastaǵy jasóspirimdi qutqarǵan erligine jurt tánti. Bul 27 qarasha kúni Astanadaǵy Aqbulaq ózeninde bolǵan oqıǵa. Qurylys kóliginde otyrǵan Mereke «sýǵa adam batyp jatyr» degendi estip, dereý beline qaýipsizdik jibin baılaı sala ózenge qaraı júgiredi. Ózen betindegi muzdyń bir jeri qalyń, bir jeri juqa. Merekeniń óz ómirine de qaýip tónip turǵan. Soǵan qaramastan ol muzǵa jata qalyp, eńbekteı jóneledi. Sýǵa batqan jasóspirimniń áli qalmaǵan. Laqtyrǵan jipti ustaýǵa da murshasy joq. Mereke oǵan barynsha jaqyndap, ony ózine qaraı tartady. Osy kezde muz shytynaı bastaıdy. Mereke óz basyn qaterge tige júrip, bozbalany sý jaǵasyna aman alyp shyqty.
Ómirge qushtarlyqtyń úlgisi
Aısulý Súleımenova. Aıtı salasynyń mamany. Ulttyq paralımpıada quramasynyń múshesi. Sport sheberligine kandıdat. Ol jıyrma jasynda jol apatyna túsip, eki aıaǵynan aıyrylady. Alaıda taǵdyrdyń bul synaǵy onyń saǵyn syndyra almady. Aısulý myqty erik-jigeriniń arqasynda qaıta aıaqqa turyp, júgirip ketti. Qazir ol - voleıboldy otyryp oınaýdan elimizdegi jalǵyz áıelder komandasynyń negizgi oıynshysy. Bıylǵy mamyrda paravoleıbolshy alǵash ret respýblıkalyq VІ jazǵy Paralımpıada oıyndaryna qatysyp, jeńimpaz atandy. Kelesi jyly Parıjde ótetin paralımpıada oıyndaryna qatysýǵa úmitti. Qazaqtyń qaısar qyzy sporttan bólek, adamdarǵa motıvatsııa berýge de ýaqyt tabady. Ol áleýmettik jeli arqyly jáne el ishin aralap basyna aýyr synaq túsken adamdarǵa erik-jiger syılap júr. Respýblıka kúni qarsańynda Memleket basshysynyń Jarlyǵymen Aısulý Súleımenovaǵa «Shapaǵat» medali tabystaldy.
Inklıýzıvti bilim berýge úles qosqan ustaz
Sáýle Saǵymbaeva. Tıflopedagog. Ol 2015 jyldan beri Astana qalasynyń Jánibek Táshenov atyndaǵy №10 mektep-gımnazııasynda ustazdyq etip keledi. Sáýle Lıabıqyzy zaǵıp balalardyń qatarynan qalmaı bilim alýyna bar kúshin salyp júr. Sonyń bir dáleli - ol «Kórý qabileti buzylǵan mektep oqýshylaryn keshendi qoldaýdy ádistemelik qamtamasyz etý» atty bilim berý baǵdarlamasyn jazyp shyqty. Nátıjesinde zaǵıp balalardy oqytatyn qanshama pedagog maman daıyndaldy. Sáýle Lıabıqyzy YouTube jelisindegi arnasy arqyly da ata-analar men muǵalimderge kásibı baǵdar berip otyrady. Jalpy, onyń ınklıýzıvti bilim berý salasyna qosyp jatqan úlesi zor
