Jaqynda Úkimetke kıik máselesine qatysty qujat usynylady
ASTANA. KAZINFORM — Taıaýda Úkimetke kıik sanyn retteýge qatysty ǵalymdardy bıologııalyq negizdemesi usynylady. Bul týraly Ekologııa jáne tabıǵı resýrstar vıtse-mınıstri Nurken Shárbıev málim etti.
Onyń aıtýynsha, byltyrǵy sanaq boıynsha elimizdegi kıik sany 2 mln 833 myńǵa jetti. Qazir olardyń sany shamamen 4 mln shamasynda. Bıyl mamyr aıyndaǵy tólin esepke alǵanda, 5 mln-nan asyp túsýi múmkin.
— Turaqty paıdalaný (kıikti aýlap, etin paıdalaný) turǵysynan biz Úkimettiń tapsyrmasy boıynsha qoǵamdyq pikirdi zerttep jatyrmyz. Depýtattardyń, ǵalymdardyń, halyqaralyq sarapshylardyń qatysýymen birqatar dóńgelek ústel otyrysy ótkizildi. Bul turǵyda kóbisi turaqty paıdalanýǵa kóshý kerek degen pikirdi alǵa tartyp otyr, — dedi Nurken Shárbıev Parlament Májilisinde kıik popýlıatsııasyna qatysty taqyrypty talqylaý kezinde.
Onyń sózine qaraǵanda, qazir Zoologııa ınstıtýty bıologııalyq negizdeme daıyndaýdy aıaqtap qaldy, osy oraıda onyń negizinde usynys jasalady.
— Osy aptada biz Úkimetke turaqty paıdalanýǵa kóshý týraly usynys engizemiz. Qarapaıym tilmen aıtqanda, bıologııalyq negizdemege sáıkes, kıiktiń belgili bir sanyn aýlaý máselesi kóteriledi, — dedi vıtse-mınıstr.
Budan buryn habarlanǵandaı, búgin Májilistegi Agrarlyq máseleler komıtetiniń keńeıtilgen otyrysynda kıiktiń egis alqaptary men shabyndyqtardy taptap ketýinen Batys Qazaqstan jáne Aqmola oblysynyń fermerleri men aýyl turǵyndary zardap shegip jatqany aıtyldy.
Sonymen qatar, Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń ǵylym jónindegi prorektory, bıologııa ǵylymdarynyń doktory Áljan Shámshidin kıikke qatysty jasalǵan zertteýler jóninde túsinik berdi.
Onyń paıymynsha, elimizdegi 4-5 mln kıiktiń jyl saıyn 20 paıyzyn etke paıdalanýǵa berýge bolady.