Jak Attalı: Nazarbaev – álemdegi dana adamdardyń biri

QazAqparat - Eýropalyq qaıta qurý jáne damý bankiniń birinshi prezıdenti Jak Attalı Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń boıyndaǵy erekshe qasıetteri týraly aıtty, dep habarlaıdy QazAqparat tilshisi.

Qazaqstan Respýblıkasynyń Tuńǵysh Prezıdenti kúnine arnalǵan «Nursultan Nazarbaev: jahandyq saıasatker» atty onlaın konferentsııasynda Jak Attalı 30 jyl buryn, Táýelsiz Qazaqstannyń qalyptasýy kezinde Eýropalyq qaıta qurý jáne damý banki qurylǵanyn atap ótti.

«EQDB — Qazaqstan óziniń daýys berý quqyǵymen tolyqqandy múshesi bolǵan alǵashqy halyqaralyq ınstıtýttardyń biri. Maǵan 30 jyl ishinde Prezıdent Nazarbaevpen birneshe ret kezdesýge jáne onyń kózqarasymen, erik-jigerimen, eldi damytý qabiletimen tanysýdyń tamasha múmkindigi týdy»,– deıdi Jak Attalı.

Sonymen qatar, ol Qazaqstan Konstıtýtsııasynyń erejelerin daıyndaýǵa kómekteskenin jáne saraptamalyq-konsýltatıvtik keńestiń múshesi bolǵanyn jetkizdi.

«Osy ýaqytta men Nazarbaevtyń saıası kóregendigin, kelissózderdi júrgizý jáne óte qıyn jaǵdaıda áreket etý qabiletin kórdim. Ol álemdegi eń dana adamdardyń biri bola alǵandyǵyna qatty qýanam. Reseı, Qytaı, Iran jáne basqa da eldermen kórshiles jatqan Qazaqstan sııaqty eldi basqarý úshin dıplomatııalyq jáne áleýmettik turǵydan orasan zor áleýet pen daǵdy qajet. Nursultan Nazarbaev osy daǵdylarǵa ıe, sonyń arqasynda ol sanaly sheshimder qabyldaı aldy, onyń biri - el astanasyn Astanaǵa aýystyrý jáne ony álemdegi eń jaqsy sáýletshilerdiń kómegimen ásem jáne halyqtyń ómir súrýine jaǵdaı jasady»,– dedi Eýropalyq qaıta qurý jáne damý bankiniń alǵashqy prezıdenti Jak Attalı.