Zeınolla Samashev: Táýelsizdik tarıhymyzdy túgendeýge jol ashty

ÓSKEMEN. QazAqparat – Belgili arheolog Zeınolla Samashev «Táýelsiz Qazaqstan: Jasampazdyqqa toly jyldar. Shyǵys Qazaqstan oblysynyń basty jetistikteri» atty dóńgelek ústelde arheologııa salasynyń jetistikterine toqtaldy, dep habarlaıdy QazAqparat tilshisi.

«Qazaq halqynyń tarıhy tereńde jatyr. Ókinishke qaraı, elimiz egemendik alǵanǵa deıin ózimizdiń ótkenimizdi zertteı almaı keldik. Al táýelsizdik tarıhymyzdy túgendeýge jol ashty. 2015 jyly oblys ákimi Danıal Ahmetovtiń qoldaýymen ár túrli ǵylymı ortalyqtarda jumys istep jatqan ǵalymdar Shyǵys Qazaqstanǵa shaqyrtylǵan. Arheologııany damytýdyń 5 jylǵa arnalǵan óńirlik baǵdarlamasy ázirlenip, qazba jumystary qolǵa alyndy. Sonyń nátıjesinde, 6 jyl ishinde álem nazaryn burǵan aýqymdy ǵylymı jańalyqtar ashyldy. Tarbaǵataı aýdanynda tonalmaǵan ekinshi Altyn adam tabyldy», - deıdi ol.

Zeınolla Samashevtyń sózinshe, Nur-Sultan men Almaty qalalarynan bilikti mamandar da tartylǵan. Qazba jumystary aldaǵy ýaqytta da jalǵasyn tabatyn bolady.

«Mundaǵy maqsat – ǵylymı jańalyq ashý ǵana emes, jańa aıtqanymdaı osy ýaqytqa deıin durys jazylmaǵan elimizdiń kóne tarıhyn jańǵyrtý. Sondaı-aq bıyldan bastap «Shyǵys Qazaqstannyń orta ǵasyrdaǵy tarıhynyń ocherkteri jáne kóne eskertkishteri» atty taqyrypta ǵylymı jınaq ázirleýge kiristik. Bul jumysqa sheteldik ǵalymdar da atsalysyp jatyr. Kelesi jyly jınaqtyń birinshi nusqasy jaryqqa shyǵady dep josparlanǵan», - deıdi arheolog.

Onyń aıtýynsha, ejelgi saq qorymdarynan tabylǵan 300 altyn artefakt osy jyldyń qyrkúıek aıynda alǵash ret Ulybrıtanııanyń Kembrıdj qalasynda ornalasqan Fıtsýılıam mýzeıine qoıylmaq.