Zeınetaqynyń bir bóligine ótinim berýden bastap paıdaǵa jaratýǵa deıingi algorıtm jarııalandy
«Búgingi tańda Otbasy bankimen qatar, Halyq banki de ókiletti organ retinde osymen jumys isteıtinin (zeınetaqynyń bir bóligin alý isimen) jarııalap otyr. Olar da arnaıy esepshottardy ashyp jatyr», - dedi Jansultan Mataev Ortalyq kommýnıkatsııalar qyzmetiniń alańynda ótken baspasóz máslıhatynda.
Bank ókili óz sózinde ótinimdi berilgennen keıingi jumys algorıtmi qalaı bolatynyn túsindirdi.
«Osy baǵdarlamaǵa qatysqysy keletin azamattar biryńǵaı zeınetaqy jınaǵy qoryndaǵy óziniń jınaǵyn esepteýi kerek. Odan keıin «Otbasy bankinde» nemese óz qalaýy boıynsha ekinshi deńgeıli bankterden arnaıy shot ashýy kerek. Úshinshi qadam: erteń, ıaǵnı 23 qańtardan saǵat tańerteńgi 09.00-de «Otbasy bankte» portaly ashylady. Sol portalǵa azamattar óziniń elektrondy qoltańbasy arqyly kiredi. Ol portalǵa azamattar jetkilikti deńgeıden artyq somany qaı maqsatqa paıdalanatynyn kórsetip, ótinim beredi. Al ótinim zeınetaqy qoryna joldanady. Bes kúnniń ishinde ol jaqtan jaýap kelip, maquldanǵannan keıin azamat «Otbasy banktiń» portaly arqyly rastaıtyn qujattardy tirkep, arnaıy esepshotyndaǵy aqshany ózi kórsetken rekvızıtter boıynsha satyp alýshyǵa, ne bolmasa ıpotekany óteýge joldaıdy», - dedi ol.
Eske sala ketsek, buǵan deıin qurylys jəne turǵyn úı-kommýnaldyq sharýashylyq isteri komıteti tóraǵasynyń orynbasary Erkebulan Daýylbaev azamattar zeınetaqy jınaǵynyń bir bóligin qandaı jaǵdaıda paıdalana alatynyn túsindirgen bolatyn.
