Zeınetaqyny qalaı esepteý kerek - BJZQ zeınetaqy kalkýlıatoryn jańartty
«Boljamdy zeınetaqy kalkýlıatory BJZQ-nyń árbir salymshysyna óziniń bolashaq zeınetaqy tólemderiniń mólsherin anyqtaýǵa kómektesedi. Bul rette ol memlekettik bazalyq zeınetaqy men jasyna baılanysty ortaq zeınetaqyny jáne BJZQ tólemderin qatar kórsetedi. Odan basqa mindetti zeınetaqy jarnalary (MZJ), mindetti kásiptik zeınetaqy jarnalary (MKZJ) jáne erikti zeınetaqy jarnalary (EZJ) boıynsha ashylǵan shottardaǵy qarajatty qosyp, jalpy somasyn shyǵarady»,- delingen Qor habarlamasynda.
Esepteý qorytyndysy: pessımıstik, realıstik jáne optımıstik stsenarıı boıynsha shyǵarylady. Barlyq úsh nusqada ınflıatsııanyń kútiletin deńgeıi men tabystylyq esepke alynady.
Atap ótý kerek, kalkýlıatordyń jańa nusqasyna mindetti kásiptik zeınetaqy jarnalary men erikti zeınetaqy jarnalary boıynsha tólemder qosyldy. Buryn olar joq bolatyn. Bul rette erikti zeınetaqy jarnalaryn tabystyń belgili bir paıyzy retinde emes, naqty somasy boıynsha kórsetýge bolady.
Zeınetaqynyń boljamdy mólsherin esepteý úshin tıisti baǵandarǵa týǵan kúndi, jynysty, eńbek ótilin, jınaqtaýshy zeınetaqy júıesine qatysý ýaqytyn, zeınetaqy jınaqtarynyń jalpy somasyn jáne jalaqyny engizseńiz bolǵany.
Eger Siz zeınetaqy kalkýlıatoryn Qordyń enpf.kz saıtynyń Jeke kabıneti arqyly ashatyn bolsańyz, jınaqtardyń somasy avtomatty túrde engiziledi.
Qor mamandary kalkýlıatordy anaǵurlym yńǵaıly ete otyryp, kórneki syzbasyn jańartty. Endi jańartylǵan zeınetaqy kalkýlıatoryndaǵy qorytyndy nátıjeler kórneki syzba men tólemder kestesiniń kómegimen kórsetiledi. Barlyq boljamdy nátıjeler tıisti kezeńdegi ınflıatsııany shegere otyryp, naqty qundyq shamada kórsetiledi.
Zeınetaqy kalkýlıatoryn paıdalaný óte ońaı. Alaıda eger qandaı da bir qıyndyqtar nemese suraqtar týyndasa, enpf.kz saıtynda arnaıy jadynamamen tanysýǵa bolady. Onda kalkýlıatordy paıdalanýdyń naqty nusqaýlyǵy kórsetilgen.