Zeınetaqy jınaǵyn paıdalaný: 140 myń salymshydan ótinim tústi

ALMATY. QazAqparat – 17 aqpandaǵy jaǵdaı boıynsha Biryńǵaı jınaqtaýshy zeınetaqy qoryna ýákiletti operatorlardan merziminen buryn tólemderdi júzege asyrýǵa maqsatty paıdalaný úshin 140 941 salymshynyń ótinishi kelip tústi, dep habarlaıdy QazAqparat tilshisi.

«Jalpy somasy 496,7 mlrd teńgege jýyq 92 126 ótinish oryndaldy. Salymshylardyń arnaıy shottaryna túsken tólemderdiń ortasha somasy 5,4 mln teńgeden asady. Arnaıy shottarǵa tólem alǵandardyń 20% jýyǵy Almaty qalasynda turady, oryndalǵan ótinishterdiń 17% paıyzy Mańǵystaý oblysynyń turǵyndarynan, al 16% elordamyz Nur-Sultan qalasynan jiberilgen»,-dep habarlady BJZQ baspasóz qyzmeti.

23 mlrd teńgege jýyq somaǵa 4 482 ótinish tólemderdi júzege asyrý úshin óńdelýde. Zańnama talaptaryna sáıkes kelmeýine baılanysty 42 579 ótinim qabyldanbady.

Oryndalǵan ótinishterge jasalǵan taldaý 39% paıyz ıpotekalyq qaryz boıynsha bereshekti ishinara nemese tolyq óteý maqsatyna baǵyttalǵanyn kórsetedi. Ótinish bildirgen salymshylardyń shamamen 26% zeınetaqy aqshasyn turǵyn úıdi ıpotekasyz (tolyq satyp alý) satyp alýǵa jiberý týraly sheshim qabyldaǵan.

Zeınetaqy jınaqtaryn paıdalanýǵa tanymaldyǵy jaǵynan úshinshi oryndaǵy suranys – jaqyn týystaryna berý (ótinishterdiń 19% astamy). Birjolǵy zeınetaqy tólemderin paıdalaný maqsattary týraly tolyq aqparat enpf.kz saıtyndaǵy «Kórsetkishter» - «Turǵyn úı jaǵdaılaryn jaqsartýǵa arnalǵan maqsattar boıynsha birjolǵy zeınetaqy tólemderi» bóliminde ornalastyrylǵan.