Zeınetaqy jınaǵyn baspana men bilim alýǵa qashan jumsaýǵa bolady – mınıstrdiń jaýaby

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Birjan Nurymbetov zeınetaqy qoryndaǵy qarajatty qazaqstandyqtardyń baspana men bilim alý maqsatynda jumsaý jospary qashan ázir bolatynyn aıtyp berdi, dep habarlaıdy QazAqparat tilshisi.

Búgin QR Eńbek jáne halyqty áleýmettik qorǵaý mınıstrliginde elordanyń jekelegen kásiporyndaryndaǵy eńbek qatynastarynyń problemalyq máselelerine arnalǵan keńes otyrysy ótti.

«Qazirgi ýaqytta biryńǵaı zeınetaqy jınaqtaý qorynda 10 trln teńge kóleminde qarajat bar. Bul degenimiz shamamen 9 mln 900 myń adamnyń zeınetaqy qory. Orta eseppen alsaq, bul jınaqtalǵan soma adam basyna shaqqanda 1 mln teńgeden keledi. Sondyqtan da Prezıdenttiń Joldaýynda aıtylǵan zeınetaqy qoryndaǵy jınaqtalǵan qarjyny qazaqstandyqtardyń baspana men bilim alýǵa jumsaý máselesin biz búginde Ulttyq bankpen birlesip qarastyryp jatyrmyz. Árıne, bul keń talqydan ótýi qajet. Sebebi zeınetaqy qoryndaǵy qarajat bolashaqtyń aqshasy, ıaǵnı zeınetkerlikke shyqqanda beriletin tólemaqy. Jyl sońyna deıin onyń qalaı júzege asyrylatyny týraly jospardy ázirleıtin bolamyz», - dedi Birjan Nurymbetov keńes otyrysynan soń jýrnalısterdiń suraǵyna jaýap bere otyryp.

Eske sala ketsek, Memleket basshysy Qasym-Jomart Toqaev 2 qyrkúıektegi óz Jodaýynda azamattar zeınetaqy jınaǵyn baspana men bilim alýǵa jumsaı alýy kerektigin aıtqan. Jáne Úkimetke azamattardyń zeınetaqy jınaqtaryn maqsatty paıdalaný máselesin pysyqtaýdy tapsyrdy.