Zeınetaqy jınaǵymen baspana alýǵa múmkindik beretin tetikter daıyn - Saparbaev

NUR-SULTAN. QazAqparat – Búgin-erteń zeınetaqy jınaǵyn baspana men bilim alýǵa jumsaýǵa múmkindik beretin naqty tetikter Prezıdent qaraýyna usynylady. Bul týraly búgin Úkimet úıindegi baspasóz máslıhatynda QR Premer-Mınıstriniń orynbasary Berdibek Saparbaev aıtty, dep habarlaıdy QazAqparat tilshisi.

«Úkimet janynan jumys toby qurylǵan. Biz qazirgi ýaqytta usynystar ázirledik, Prezıdentke usynatyn bolamyz. Túpkilikti sheshimdi Prezıdent qabyldaıdy. Birneshe ret aıtqanmyn, taǵy da qaıtalap aıtamyn. Zeınetaqy jınaǵyn paıdalaný salymshy jınaǵynyń somasyna baılanysty bolady. Belgilengen norma bar. ıAǵnı, biz tıisti esepteýlerin shyǵardyq. Birinshisi - búgingi kúnge deıin jınaqtalǵan jınaq somasy. Ekinshisi – qazaqstandyqtardyń ortasha ómir súrý uzaqtyǵy. Zeınetkerlikke shyqqannan keıin qazaqstandyq qansha jyl ómir súretindigin eseptedik. ıAǵnı, salymshynyń esepshotynda qansha jylǵa jetetin jınaq bolýy qajettigin anyqtadyq», - dedi Úkimet basshysynyń orynbasary.

Onyń atap ótýinshe, salymshy zeınetaqy jınaǵynynyń belgili bir mólsherin baspana satyp alýǵa nemese bilim alýǵa jumsaýy úshin onyń esepshotynda qalatyn soma 75 jasqa deıin ómir súrýine jetkilikti bolýy qajet.

«Búgin-erteń óz usynystarymyzdy Prezıdent ákimshiligine beremiz jáne Prezıdent tarapynan sheshim qabyldanady», - dedi Berdibek Saparbaev.

Premer-Mınıstrdiń dereginshe, 9 mln 600 myń salymshynyń 10 trln teńge jınaǵy bar. Ortasha eseppen bir salymshynyń esepshotynda 1 mln teńge ǵana jınaqtalǵan.

«Bizdiń esebimizshe, salymshy zeınetke shyqqannan keıin jaqsy ómir súrýi úshin esepshotynda 11-12 mln teńge qarajaty bolýy kerek. Jalpy, árbir qazaqstandyń jınaǵyna qatysty naqty esebimiz bar», - dedi ol.

Eske sala ketsek, Memleket basshysy Qazaqstan halqyna Joldaýynda Úkimetke azamattardyń zeınetaqy jınaqtaryn baspana alýǵa jumsaýyn retteýdi tapsyrǵan bolatyn.