Zeınetaqy jarnalarynyń saqtalýyna memleket kepildik beredi - BJZQ
«Zeınetaqy jınaqtarynyń saqtalýyna memleket tarapynan kepildik berilgen» dep sendirdi BJZQ basshylary.
«Qazaqstanda zeınetaqy jınaqtarynyń saqtalýyn qamtamasyz etý boıynsha biregeı memlekettik kepildik modeli jumys isteıdi. Osy modelge sáıkes «Qazaqstan Respýblıkasynda zeınetaqymen qamsyzdandyrý týraly» QR Zańynyń 5-baby negizinde zeınetaqy tólemderin alý quqyǵy týyndaǵan shaqta ınflıatsııa deńgeıin eskere otyryp, naqty engizilgen mindetti zeınetaqy jarnalary (MZJ) men mindetti kásiptik zeınetaqy jarnalarynyń (MKZJ) jeke zeınetaqy shotynda jatqan zeınetaqy jınaqtarynyń somasy arasyndaǵy aıyrma tólemi esepteledi», - dedi Basqarma tóraıymy Sáýle Egeýbaeva.
Memlekettik kepildik boıynsha aıyrma somasyn esepteý jáne tóleýdi «Azamattarǵa arnalǵan úkimet» Memlekettik korporatsııasy» kommertsııalyq emes aktsıonerlik qoǵamynyń (KEAQ) fılıaly (burynǵy Zeınetaqy tólemderi jónindegi memlekettik ortalyq) júzege asyrady. Zeınetaqy jınaqtary boıynsha bir jolǵy tólemdi alý úshin osy uıymǵa júginip, tıisti ótinishti toltyrý qajet.
S.Egeýbaevanyń aıtýynsha, memlekettik kepildik boıynsha aıyrma tólemin zeınetkerlik jasqa jetken tulǵalar, múgedekter, Qazaqstannan ketip jatqan sheteldikter alýǵa quqyly. Aıyrma tólemin alýǵa quqyǵy bar adam qaıtys bolǵan jaǵdaıda bul tólem QR Azamattyq kodeksinde belgilengen tártipte muragerge tólenedi.
Qarjy mınıstrliginiń derekteri boıynsha memlekettiń zeınetaqy jarnalarynyń saqtalýy boıynsha kepildikti mindettemeler 2016 jyly 11 mlrd 615 mln. teńge bolsa, 2017 jyldyń qańtar-naýryz aılarynda 2 mlrd 589 mln. teńgeni qurady.