Zeınetaqy qoryndaǵy 675 myń shottyń ıeleri tabyldy

ALMATY. QazAqparat –Biryńǵaı jınaqtaýshy zeınetaqy qorynyń qyzmetkerleri suraýsyz qalǵan 675 myń zeınetaqy shottarynyń ıelerimen baılanys ornatty, dep habarlaıdy QazAqparat tilshisi.

Bul bir jyl jáne odan da kóp jyldardan beri jarna túspegen qaraýsyz qalǵan shottar.

«Olardyń qatarynda ózin-ózi jumyspen qamtýshylar, jumyssyzdar, sondaı-aq zeınetaqy jarnalaryn ýaqytsha aýdarmaǵandar: úıde bir jyldan astam ýaqyttan beri dekrettik demalysta otyrǵandar, tájirıbe jumysyndaǵylar, taǵylymdamadan ótýshiler, úı sharýasyndaǵy áıelder, múgedektigi bar adamdar, áskerı qyzmetshiler men sottalǵandardyń shottary»,– delingen BJZQ tartqan habarlamada.

Qor mamandary túsindirý jumystary aıasynda salymshylarǵa mindetti zeınetaqy jarnalaryn aýdarýdyń mańyzdylyǵyn túsindirdi. Sonyń arqasynda 128 myń jeke zeınetaqy shotyna jalpy somasy 4 mlrd teńgege 523 202 jarna kelip tústi. Sonymen qatar, qor sońǵy jyldary shottaryna zeınetaqy jarnasyn aýdarmaı júrgen salymshylardy izdestirý jumystaryn odan ári jalǵastyryp jatyr.