Zeınetaqy qory men BQO ákimdigi arasynda memorandýmǵa qol qoıyldy
Atalmysh qor ókilderimen BQO ákimdiginde bolǵan kezdesýde oblys ákiminiń orynbasary Baǵdat Azbaevtyń atap ótkenindeı, Qazaqstannyń zeınetaqy júıesi jańǵyrtyla túsýde, sondyqtan munyń qoǵam úshin mańyzy zor. Zańdy sıpat alǵan zeınetaqy júıesindegi jańa ózgertýler memlekettiń jańa áleýmettik saıasatynyń quramdas bóligi bolyp tabylady. Jańǵyrtý úderisi halyqtyń áleýmettik jaǵdaıyn jaqsartýdy kózdeıdi, memlekettiń azamattardy eńbekke ornalastyrýdaǵy jaýapkershiligin arttyrady. Eń bastysy, Qazaqstan azamattary laıyqty zeınetaqy tólemderimen qamtamasyz etilýi qajet.
Batys Qazaqstan oblysynda 630 myńnan astam adam tursa, sonyń 336 myńy ekonomıkalyq belsendi turǵyndar bolyp esepteledi. 357 myńnan astam batysqazaqstandyqtyń mindetti zeınetaqy shottary bar. Jınaqtalǵan zeınetaqy kólemi 289 mlrd teńgege jetti, bul - Qazaqstandaǵy barlyq zeınetaqy jınaǵynyń 4 paıyzy. Orta eseppen ár salymshynyń esebinde 821 myń teńge bar, bul respýblıkalyq kórsetkishten joǵary.
«Biryńǵaı jınaqtaýshy zeınetaqy qory» AQ basqarma tóraǵasynyń orynbasary Sáýle Egeýbaevanyń aıtýynsha, aldaǵy jyly Qazaqstan zeınetaqy jınaqtaý júıesine 20 jyl tolmaqshy. Bıylǵy 1 qazandaǵy málimet boıynsha respýblıkadaǵy zeınetaqy jınaǵy kólemi 7 trln 539 mlrd teńgege jetti. 2018 jylǵy 1 qańtardan bastap elimizde zeınetaqy tóleýdiń kestesi ózgeredi. Degenmen zeınetaqy jınaqtaý júıesiniń negizgi baǵyttary burynǵy qalpynda qalady. 2014 jyly qabyldanǵan zeınetaqy júıesin damytý tujyrymdamasyna sáıkes reformalar júrgizilip jatqany belgili. El ekonomıkasyn damytýdaǵy zeınetaqy qorynyń yqpalyn eskere otyryp, ony tıimdi basqarýdyń mańyzy zor. Osy oraıda Elbasy tapsyrmasyna sáıkes QR Ulttyq banki zeınetaqy aktıvterin básekege qabiletti ortaǵa berýge qatysty usynym jobasyn daıyndady. Zaman talaptaryna sáıkes qazirgi ýaqytta zeınetaqy qorynyń elektrondy qyzmeti jetildirilýde. Inflıatsııa quny eskerilip, zeınetaqy tólemderine memlekettik kepildeme beriledi.
Memorandýmǵa sáıkes taraptar turǵyndardyń qarjylyq saýattylyǵyn kóterý, mindetti zeınetaqy tólemderiniń kólemin kóbeıtip, ýaqtyly túsýin qamtamasyz etý, zeınetaqy júıesin jańǵyrtý máseleleri boıynsha aqparattandyrý, sondaı-aq qor qyzmetiniń balama múmkindikterin paıdalaný baǵytynda birlesip jumys jasaýǵa ýaǵdalasty.