Zeınetaqy annýıteti máselesi: áıelder erlerden kóbirek aqsha jınaý qajet

ASTANA. QazAqparat - Ortalyq kommýnıkatsııalar qyzmetinde ótken baspasóz máslıhatynda QR Eńbek jáne halyqty áleýmettik qorǵaý vıtse-mınıstri Svetlana Jaqypova zeınetaqy annýıtetin rásimdeý úshin áıelderdiń ne sebepti erlerden kóbirek aqsha jınaýy qajettigin túsindirip berdi, dep habarlaıdy QazAqparat tilshisi.

«Búginde zeınetaqy annýıtetiniń (jyl saıynǵy tólemaqy, turaqty túsim) qunyn tólep alý somasy áıelder úshin 12 mıllıon teńgeni quraıdy. Máselen, 50 jasta zeınetaqy annýıtetin satyp alyp, zeınetaqy tólemin alýǵa bolady. Biraq bul tólem zeınet jasyna jetkende ǵana berile bastaıdy. ıAǵnı, áıel 63 jasqa tolǵanda ǵana, zeınetaqy tólenedi», - dep jaýap berdi Svetlana Jaqypova jýrnalıster suraǵyna.

«Barlyǵy mundaı qordy qaıdan tabamyz deıdi. Jınaqtyń bolýy da múmkin emes, sebebi bizdegi zeınetaqy júıesine endi ǵana 20 jyl tolyp otyr», - dep tolyqtyrdy óz sózin vıtse-mınıstr.

Onyń aıtýynsha, adamnyń qaı kezde eńbek naryǵyna engenin esepteý qajet.

«Máselen, ortasha statıstıkada adam 17 jasta oqýǵa túsedi jáne 63 jasqa deıin jumys isteıdi. Demek, 63-ten 17-ni azaıtsaq, onyń eńbek ótili 46 jyldy quraıdy. Zeınetaqy júıesine zeınetaqy qory saıma-saı bolý úshin eń kemi 40 jyl qajet. Al bizdiń júıege bar bolǵany 20 jyl. Árıne, 20 jylda eshkim mundaı somany jınap úlgermeıdi. Barlyǵy 100 myń teńge jalaqymen 10 mıllıon teńge jınaýdyń múmkin emestigin aıtyp, narazy bolýda. Árıne, 100 myń teńgeni resmı túrde alyp, qalǵan 100 myńdy jasyryp qalsańyzdar, bul somany eshqashan jınaı almaısyzdar», - dep málimdedi vıtse-mınıstr.

Sonymen birge, 50 jasta zeınetaqy annýıtetin rásimdeý úshin áıeldermen salystyrǵanda, erlerden azyraq aqsha talap etiledi. 

«Erler úshin áıeldermen salystyrǵanda sál azyraq - 8-10 mıllıon teńge aralyǵynda tólem talap etiledi. Sebebi, erlerge qaraǵanda, áıelderdiń zeınet jasynan keıingi ómir súrý kezeńi uzaǵyraq», - dep túsindirdi S.Jaqypova.