Zeınetaqy jınaǵyn emge paıdalaný múmkindigi qaıta enýi múmkin

ASTANA. KAZINFORM – Otbasy bank zeınetaqy jınaqtaryn emdelýge, sonyń ishinde stomatologııalyq qyzmetterge paıdalaný múmkindigin qaıta engizý boıynsha jumys júrgizip jatyr. Bul týraly banktiń basqarma tóraıymy Lázzat Ibragımova Úkimettegi brıfıngide aıtty.  

Onyń aıtýynsha, bul múmkindik halyq arasynda úlken suranysqa ıe bolǵan.

– Jınaqtardy maqsatsyz paıdalanǵan halyqtyń 10%-ynyń kesirinen salymshylardyń 90%-y osy múmkindikten aıyrylǵany ókinishti. Meniń oıymsha, bul – ádiletsiz. Qazir biz 2026 jyldyń sońyna deıin osy protsesti birizdendirý baǵytynda jumys istep jatyrmyz. Júıede stomatologııalyq klınıkalar da, basqa da qyzmet kórsetetin barlyq klınıka bolady dep josparlanyp otyr. Oryndalǵan jumys aktileri onlaın formatta rásimdeledi, QR Densaýlyq saqtaý mınıstrligi júıesimen ıntegratsııa jasalady. Barlyǵy ashyq ári túsinikti bolady, - dedi Lázzat Ibragımova.

L. Ibragımova zeınetaqy jınaqtaryn emdelýge paıdalaný múmkindigin qaıta engizý týraly sońǵy sheshimdi Densaýlyq saqtaý mınıstrligi qabyldaıtynyn aıtyp otyr. 

Aıta keteıik, buǵan deıin bir aıdyń ishinde qazaqstandyqtar radıohırýrgııalyq em alýǵa 5,6 mlrd teńge kóleminde zeınetaqy tólemin alǵany habarlanǵan bolatyn.

Sondaı-aq ótken jyly azamattarǵa zeınetaqy jınaqtaryn plastıkalyq operatsııalarǵa paıdalanýǵa tyıym salynǵany belgili. 

Bıyl 12 qańtarda zeınetaqy jınaǵy esebinen emdelýge ótinim qabyldaý ýaqytsha toqtatyldy.