Zeınetaqy aktıvterin basqarýda qandaı ózgeris bar

ASTANA. KAZINFORM – Qazaqstannyń biryńǵaı jınaqtaýshy zeınetaqy qoryndaǵy aktıvter kólemi 25,9 trıllıon teńgege jetti. Ulttyq bank zeınetaqy jınaqtarynyń tabystylyǵyn arttyrý maqsatynda valıýtalyq portfeldiń qurylymyn ózgertip, ınvestıtsııalardy joǵary kiristi quraldarǵa baǵyttaı bastady. Bul týraly Senattyń Qarjy jáne bıýdjet komıtetiniń otyrysynda Ulttyq bank tóraǵasynyń orynbasary Aqyljan Baımaǵambetov málimdedi.

Baıandamaǵa sáıkes, sońǵy bir jylda zeınetaqy aktıvteri 12%-ǵa nemese 2,7 trıllıon teńgege ulǵaıǵan. Qazirgi ýaqytta portfeldiń 40%-dan astamy shetel valıýtasynda saqtalyp otyr.

Ulttyq bank ókili Parlament Senatynyń zeınetaqy aktıvteriniń kiristiligin arttyrý týraly usynystaryn eskere otyryp, ınvestıtsııalyq deklaratsııaǵa mańyzdy túzetýler engizilgenin jetkizdi.

Endi zeınetaqy aqshasy tek memlekettik qaǵazdarǵa ǵana emes, táýekeli joǵary bolsa da, tabysy mol aktıvterge salynady.

– Biz valıýtalyq portfeldegi AQSh memlekettik baǵaly qaǵazdarynyń úlesin 30%-dan 15%-ǵa deıin tómendetip, esesine álemdik aktsııalardyń úlesin 25%-dan 30%-ǵa deıin arttyrdyq. Sondaı-aq portfelge maqsatty úlesi 10% bolatyn balamaly quraldar engizildi. Sarapshylardyń baǵalaýynsha, mundaı balama quraldardyń uzaqmerzimdi tabystylyǵy 7-9%-dy quraıdy. Bul dástúrli oblıgatsııalarmen salystyrǵanda áldeqaıda joǵary kórsetkish, – dedi Ulttyq bank tóraǵasynyń orynbasary.

Mundaı strategııa halyqaralyq tájirıbege negizdelgen. Máselen Kanada men AQSh-tyń iri zeınetaqy qorlary óz aktıvteriniń 30-dan 50%-na deıingi bóligin dál osyndaı balamaly quraldarda ustaıdy. 

 

Ulttyq bank bul tásil zeınetaqy jınaqtaryn ınflıatsııadan qorǵap qana qoımaı, onyń tabys ákeletinine senimdi.

– 2025 jyldyń qorytyndysy boıynsha zeınetaqy aktıvteriniń kiristiligi 7,43%-dy, al ınvestıtsııalyq kiris 1,77 trıllıon teńgeni qurady. Mańyzdysy – qazirgi tańda jınaqtalǵan kiristilik deńgeıi ınflıatsııadan joǵary. Biz aldaǵy ýaqytta da valıýtalyq úlesti 40% deńgeıinde saqtap, jergilikti naryqta tek naryqtyq mólsherlemeler boıynsha ınvestıtsııalaýdy jalǵastyramyz, – dep túıindedi baıandamashy.

Aıta keteıik, búginde Qazaqstannyń memlekettik baǵaly qaǵazdary zeınetaqy portfeliniń 43 paıyzyn qurap otyr.

Buǵan deıin Eńbek jáne halyqty áleýmettik qorǵaý mınıstri Asqarbek Ertaev zeınetaqy jınaǵyn merziminen buryn alý talaby qatańdaıtynyn habarlaǵan edi.