Zeınep Ahmetovanyń jańa kitaby jaryq kórdi

ASTANA. QazAqparat - Qazaqstandyq jazýshy, Baýyrjan Momyshulynyń kelini, qazaqy dástúrlerdi, otbasylyq qundylyqtardy nasıhattaýshy Zeınep Ahmetovanyń jańa kitaby jaryq kórdi, dep habarlaıdy QazAqparat tilshisi.

«Shýaqty kúnder» jáne «Babalar amanaty» kitaptarymen tanylǵan jazýshy «Kúretamyr» dep ataǵan kezekti kitabyn bala tárbıesine arnap otyr. 

«Qazaqtyń salt-dástúri týraly kóptegen eńbekterde ulttyq jón-joralǵylar týraly qysqasha maǵlumat qana beriletin. Zeınep apanyń jańa kitabynda kelinniń boıyna bala bitkennen, onyń dúnıege kelýi, ósýi, múshel jasqa jetýine deıingi aralyqta jasalatyn salt-dástúr men yrym-tyıymdar, olardyń mán-maǵynasy, ne úshin jasalatyny keńinen túsindiriledi», - dep jaýap berdi QazAqparat saýalyna Z.Ahmetovanyń kómekshisi, jýrnalıst Aıgúl Bolathanqyzy. 

Jańa kitap 2 myń taralymen, demeýshiniń qarjysyna shyǵarylǵan. Kitap dúkender jelisine ázirge túspegendikten ony avtordyń kómekshisinen alýǵa bolady.