Zertteý: chat-bottar jaýaptyń 40 paıyzdaıyn oıdan shyǵarady

ASTANA. KAZINFORM – Zertteý nátıjelerine sáıkes, ChatGPT, Claude, Gemini jáne basqa da chat-bottar óz jaýaptarynyń shamamen 40 paıyzyna deıingi bóligin oıdan shyǵaryp, olardy shyndyq retinde usynady, dep habarlaıdy DW. 

Bul zertteýdi Eýropalyq habar taratý odaǵy (EBU) júrgizgen.

Tagesschau basylymynyń jazýynsha, ásirese aımaqtyq jańalyqtar nemese birneshe aqparattyq úzindilerdi biriktirý kezinde chat-bottar jıi jalǵan málimet beredi.

Mysal retinde ártúrli chat-bottardyń jalǵan tujyrymdary keltirilgen: mysaly, ChatGPT Rım papasy Frantsısk tiri dep aıtýy múmkin, Microsoft Copilot Shvetsııanyń NATO músheligin bilmeıdi, al Google Gemini AQSh zańdaryna qaıshy bolsa da, Donald Tramptyń qaıta saılanýy múmkin dep esepteıdi.

Zertteýshilerdiń aıtýynsha, paıdalanýshylar chat-bottardyń jaýaptaryna jıi senip, aqparattyń durystyǵyn teksermeıdi. Mundaı jaǵdaı, mysaly, saılaýshylardyń daýys berý kezindegi sheshimine jalǵan aqparattyń áser etýine ákelýi múmkin.

EBU jańalyqtardy oqyǵanda tekserilgen, senimdi saıttarǵa súıenýge jáne jasandy ıntellekttiń jaýaptaryn fakt retinde qabyldamaýǵa shaqyrdy.

Aıta ketelik jasandy ıntellekt eshqashan adamnyń ornyn almastyra almaıdy. Sol úshin onyń bergen jaýabyna tolyq senýdiń qajeti joq.