Zaısan, Katonqaraǵaı jáne Kendirli kýrorttyq aımaqtarynda áýejaı qurylysy bastaldy
ASTANA. KAZINFORM — Prezıdenttiń tapsyrmasyna sáıkes ishki týrızmdi jáne jolaýshylar áýe tasymalyn damytý maqsatynda 2025 jyly Zaısan, Katonqaraǵaı jáne Kendirli kýrorttyq aımaqtarynda jańa úsh áýejaıdyń qurylysy bastaldy. Bul týraly QR Kólik mınıstrligi málim etti.
Qazaqstan Respýblıkasynyń Prezıdenti Qasym-Jomart Toqaev: «Katonqaraǵaı, Zaısan jáne Kendirli óńirleriniń de týrıstik áleýetin durys paıdalaný qajet. Osyndaı demalys aımaqtarynda sapasy joǵary jol ınfraqurylymy bar áýe beketteri men áýejaılar salý kerek» — degen bolatyn.
Prezıdent tapsyrmasy aıasynda bul jobalardyń iske asyrylýy óńirlerdegi ekonomıkanyń damýyna jańa ımpýls beredi, sondaı-aq otandyq jáne sheteldik týrıster aǵynyn arttyrýǵa jáne atalǵan jobalar jergilikti turǵyndardy qosymsha jumys oryndarymen qamtamasyz etýge septigin tıgizedi.
Sonymen qatar, 2024 jyly iri habtardy damytý maqsatynda áýe kóligi ınfraqurylymyn jańǵyrtýaıasynda úsh jańa jolaýshylar termınaly paıdalanýǵa berildi. Máselen Almaty, Shymkent jáne Qyzylorda qalalarynda jolaýshylar termınalynyń ótkizý qabileti ulǵaıdy.
— Almaty qalasy halyqaralyq áýejaıynyń jańa termınaly — obektiniń ótkizý qabileti jylyna 2,5 mln-nan 14 mln. jolaýshyǵa deıin ulǵaıdy. Otandyq avıakompanııalar Air Astana, SCAT, Qazaq Air, Fly Arystan Qazaqstannyń 19 qalasynaturaqty ushýdy oryndaıdy. Halyqaralyq áýe qatynasyn álemniń 26 elinde 50 baǵyt boıynsha 30 sheteldik avıakompanııa oryndaıdy, — delingen vedomstvo habarlamasynda.
Shymkent qalasy áýejaıynyń jańa termınalynyń — ótkizý qabileti jylyna 800 myńnan 6 mln. jolaýshyǵa deıin. Jańa termınal halyqaralyq áýe marshrýttarynyń sanyn 10-ǵa, reısterdi aptasyna 24-ke deıin arttyrdy. Djıdda, Medına (KSA), Doha (Katar), Fýkýok (Vetnam) jáne Phýketke (Taıland) áýe qatynasy ashyldy.
Qyzylorda qalasynyń «Qorqyt Ata» halyqaralyq áýejaıynyń — ótkizý qabileti jylyna 300 myńnan 2 mln. jolaýshyǵa deıin ósti. Búgingi tańda Qyzylorda qalasynan 25 ishki reıs oryndalyp otyr.
«SKYHANSA» qazaqstan-germandyq kompanııasymen «Qorǵas — Shyǵys qaqpasy» arnaıy ekonomıkalyq aımaǵynda qýaty saǵatyna 500 adamǵa deıingi jolaýshylar termınalyn, syıymdylyǵy 550 000 tonnaǵa deıingi otyn qoımasyn, júkterdi 250 000 tonnaǵa deıin tolyq óńdeıtin júk termınalyn salý, áýe kemelerine qyzmet kórsetý avıatsııalyq-tehnıkalyq ortalyq qurý boıynsha joba iske asyrylýda. Sondaı-aq 300-den astam turaqty jumys oryndaryn qura otyryp, halyq úshin týrıstik jáne saýda, oıyn-saýyq qyzmetterin damytý josparlanǵan.
Sońǵy jyldary áýe kóligi jolaýshylar úshin yńǵaıly ári tartymdy bolýda. Mysaly Qazaqstanda jyl saıyn áýe tasymaly 10-15% artqan.
– 2024 jyly qazaqstandyq avıakompanııalar 15 mıllıonǵa jýyq adamdy tasymaldady, áýejaılar 30 mıllıon jolaýshyǵa, onyń ishinde sheteldik avıakompanııalar men azamattarǵa qyzmet kórsetti. 2024 jyly júk tasymaly kólemi — jylyna 28 myń tonnaǵa ulǵaıdy. Otandyq kompanııalardyń ushaqtar parki jyl saıyn 10-15 ushaqqa tolyqtyrylýda. Búgingi kúni áýe kemeleriniń sany — 102 ushaq, – dep habarlady Kólik mınıstrliginen.
Búgingi tańda Qazaqstannan halyqaralyq áýe qatynasy 31 elmen (Reseı, Qyrǵyzstan, Ózbekstan, Tájikstan, Grýzııa, Belarýs, Ázirbaıjan, BAÁ, Saýd Arabııasy, Qatar, Iran, Oman, Egıpet, Kýveıt, Ońtústik Koreıa, Qytaı, Úndistan, Vetnam, Taıland, Mońǵolııa, Kambodja, Malaızııa, Maldıv araldary, Shrı-Lanka, Túrkııa, Ulybrıtanııa, Germanııa, Italııa, Nıderlandy, Polsha, Chehııa) aptasyna 582 reıs jıiligimen 117 baǵyt boıynsha ornatyldy.
Qazaqstannyń áýejaılarynda erekshe qajettilikteri bar azamattar úshin barlyq qajetti jaǵdaılar jasalǵan. Jerústi qyzmetiniń qyzmetkerleri alǵashqy medıtsınalyq kómek kórsetý, onyń ishinde erekshe qajettilikteri bar azamattardy súıemeldeý boıynsha turaqty arnaıy oqýdan ótedi. Ambýlatorlyq kótergishter, múgedekter arbalary, soqyrlarǵa arnalǵan taktıldi plıtkalar men dybystyq navıgatsııa júıeleri bar.
Elimizdiń halyqaralyq áýejaılarynda ana men balaǵa arnalǵan bólmeler, valıýta aıyrbastaý pýnktteri, poshta baılanysy, symsyz ınternet bar. Sondaı-aq onlaın tirkeý protsesin jyldamdatý úshin birqatar áýe kompanııalary mobıldi qosymshalardy engizdi. Kórsetiletin qyzmetter barlyq sanattaǵy azamattar úshin sapany jáne qoljetimdilikti arttyrýǵa baǵyttalǵan.
Jolaýshylar avıatasymaldary kórsetkishiniń ósýi, marshrýttardyń artýy ishki jáne sheteldik týrızmdi damytady. Bul el óńirleriniń ınvestıtsııalyq tartymdylyǵyn arttyrady.
Qazaqstanda avıatsııa salasyn damytýdy halyqaralyq taný ushý qaýipsizdigine baılanysty.
Qazaqstanda ushý qaýipsizdigi halyqaralyq standarttaryna sáıkestik deńgeıi 82% quraıdy. Bul — TMD elderi arasynda eń joǵary kórsetkish. Danııa men Polsha sııaqty Eýropa Odaǵy elderimen salystyrýǵa keledi.
Bul nátıjeler Qazaqstandaǵy avıatsııalyq týrızmdi damytýǵa, sondaı-aq elimizdiń ekonomıkalyq áleýetin nyǵaıtýǵa jáne onyń halyqaralyq arenadaǵy tartymdylyǵyn arttyrýǵa septigin tıgizedi.
Eske sala keteıik, buǵan deıin Kólik mınıstrligi 3 jańa áýejaıdyń jobalaý qujattaryn ázirleýge kiriskenin jazǵan bolatynbyz.