Zardap shekken otbasylarǵa qajetti kómekti kórsetemiz – «ArselorMıttal Temirtaý» atqarýshy dırektory
«Apattyń oryn alǵanynan qatty kúızelip turmyn. Biz shahtalardyń qaýipsizdik deńgeıin arttyrý úshin júıeli túrde jumys istedik, al bul apat bizdiń barlyq kúsh-jigerimizge úlken zardap keltirdi. Qazir eshbir sóz jaqyndarynan aıyrylǵan otbasylardy jubata almaıdy.
Apattyń oryn alǵanyna jáne jáne shahtadan qyzmetkerlerdiń barlyǵyn sátti evakýatsııalaı almaǵanymyzǵa «ArselorMıttalTemirtaý» atynan zor ókinish bildiremin. Zardap shekken otbasylardy qoldaý úshin qoldan kelgenniń bárin jasaımyz. Qazir bar oıymyz áriptesterimizdiń otbasylarynda jáne biz olarǵa qajetti barlyq kómekti kórsetetin bolamyz», - dep keltirilgen «ArselorMıttal Temirtaý» AQ saıtyna kompanııanyń atqarýshy dırektory Vıktor Gafıýlovtyń sózi.
Málim etilgendeı, «ArselorMıttal Temirtaý» apattyń sebebin tolyq tergeý úshin memlekettik organdarmen tyǵyz jumys istep jatyr. Ázirge barlyq faktiler naqty belgisiz.
Aıta keteıik, birer ýaqyt buryn órt shyqqan «Qazaqstan» shahtasynda 5-shi kenshiniń denesi tabylǵany týraly habarlandy.
Eske salsaq, Qaraǵandy oblysyndaǵy «Qazaqstan» shahtasynda órt 17 tamyz kúni saǵat 10:05-te tutandy.
Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.
5 jumysshynyń taǵdyry belgisiz boldy. Іzdestirý jumystarynyń nátıjesinde 4 adamnyń denesi tabylǵan edi.
18 tamyzdaǵy jaǵdaı boıynsha medıtsına mekemelerinde órtten zardap shekken 11 kenshi em qabyldap jatty.
Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıtetiniń tóraǵasy Tólegen Ospanqulov málim etkendeı, «Qazaqstan» shahtasyndaǵy apat úshin jaýapty tulǵa 7 jylǵa deıin túrmege qamalýy múmkin.
Prezıdent Qasym-Jomart Toqaev órt sebebin anyqtaý úshin jan-jaqty tergeý júrgizýdi tapsyrdy.
