Zańsyz qýdalanǵan BQO turǵyny 7,7 mln teńge óndirip aldy

ORAL. KAZINFORM – Batys Qazaqstan oblysynyń turǵyny zańsyz qýdalanǵany úshin sotqa shaǵym túsirdi. 

BQO sotynyń baspasóz qyzmetinen málim etkenindeı, atalǵan turǵyn 2023 jyly 6 aı ýaqytsha ustaý ızolıatoryna qamalyp, 1 aı úıqamaqta bolǵan. Odan keıin uzaq ýaqyt boıy úzdiksiz tekserýler men jaýap alý áreketteri júrgizilgen, alaıda prokýror tarapynan qylmystyq quqyq buzýshylyq quramynyń bolmaýyna baılanysty sotqa deıingi tergep-tekserýdi toqtatý týraly sheshim qabyldandy.

Sol sebepti talapker sotqa jaýapker mekeme – QR Qarjy mınıstrligi Memlekettik qazynashylyq komıtetinen 15 mln teńge mólsherinde moraldyq zııandy jáne 4 mln teńge materıaldyq shyǵyndy óteý týraly talap aryzben júgindi. 

Osy kezeńde talap qoıýshy únemi ýaıym, júıkelik kúızelis jaǵdaıynda júrgenin, sondaı-aq qylmystyq qýdalaý organdary tarapynan ózine qatysty qorqytý, psıhologııalyq qysym jáne qurmetsizdik bolǵanyn kórsetedi.

Sotpen talap qoıýshyǵa qatysty qylmystyq qýdalaýdyń zańsyz júrgizilgeni anyqtaldy, qylmystyq protsesti júrgizetin organdardyń zańsyz áreketteri saldarynan moraldyq azap shekkeni rastaldy. Sondaı-aq qylmystyq istiń qozǵalýyna baılanysty talap qoıýshy jumysynan aıyrylyp, turǵylyqty jerin aýystyrýǵa májbúr bolǵan. 

– Sot talap qoıýshynyń jaýapker mekemege qoıǵan talap aryzyn ishinara qanaǵattandyrdy. Onyń paıdasyna moraldyq zııandy óteý retinde 3 mln teńge, materıaldyq shyǵyndy óteý retinde 4 mln teńge, sondaı-aq ókildiń qyzmetine aqy tóleý boıynsha shyǵystar retinde 700 myń teńge óndirdi. Sheshim zańdy kúshine engen joq, - dep habarlady vedomstvodan. 

Eske sala keteıik, budan buryn BQO turǵyny kıik múıizin saqtaǵany úshin sottalǵanyn jazǵan bolatynbyz.