Zańsyz ákelingen smartfondar qatań baqylaýǵa alynady
ASTANA. KAZINFORM – 2024 jyly elimizde satylǵan smartfondardyń 75 paıyzy zańsyz ákelingen. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııalar komıtetiniń tóraǵasy Damır Seısembekov aıtty.
- Búginde qoldanystaǵy smartfondardyń basym bóligi – kóleńkeli aınalymda. Osyǵan oraı, abonenttik qurylǵylardy verıfıkatsııalaý tártibi engizilip, kz-imei.kz portaly arqyly tirkeý jáne zańdylyqty tekserý mehanızmi iske qosyldy. Bul shara tutynýshylardyń quqyqtaryn qorǵaýǵa, salyqtyq túsimdi arttyrýǵa jáne zańsyz saýdany qysqartýǵa baǵyttalǵan, - dedi ol Ortalyq kommýnıkatsııalar qyzmetindegi brıfıngte.
Onyń málimetinshe, resmı dıstrıbýtordan 2024 jylǵy salyq túsiminiń naqty somasy 30 mlrd teńgeden astamdy quraǵan. Al sarapshylardyń baǵalaýynsha, bul soma elimizde satylǵan jáne iske qosylǵan barlyq qurylǵynyń 25 paıyzyn ǵana qurap otyr. ıAǵnı, satylǵan smartfondardyń 75 paıyzy zańsyz ákelinip, saýdalanǵan. Al bıýdjetke túspegen salyq somasy 70-80 mlrd teńgege jetedi.
Damır Seısembekovtiń aıtýynsha, nebári eki aıdyń ishinde — 25 naýryz ben 25 mamyr aralyǵynda kz-imei.kz portaly arqyly 3,4 mıllıonnan astam smartfon sátti tirkelgen. Osy ýaqyt aralyǵynda portalǵa 4 771 qoldanýshy tirkelip, 22 myńnan astam ótinim berilgen. Bul kórsetkishter halyqtyń da, bıznestiń de ashyq ári zańdy naryqqa ótýge daıyn ekenin kórsetti.
IMEI-sáıkestendirý — qurylǵynyń zańdy ekenin rastaýǵa, «sur» taýarlardy satyp alý qaýpin azaıtýǵa jáne naryqta biryńǵaı qaýipsizdik standartyn ornatýǵa kómektesedi.
«Kóleńkeli naryqty joıý úshin mınıstrlik birqatar normatıvtik aktilerge ózgeris engizdi. Endi zańsyz ákelingen qurylǵylar qatań baqylaýǵa alynady. IMEI-kodtar halyqaralyq GSMA bazasynda tekseriledi, al satyp alýshylar úshin aldyn ala tekserý qyzmetteri kz-imei.kz portalynda usynyldy», — dedi Seısembekov.
Aıta keteıik, Óskemende stýdent túrmege smartfondar ótkizbek boldy.