Zańmen jazalanady: Dárigerler jelidegi búıregimdi satamyn degen habarlandyrýlarǵa jaýap berdi

ASTANA. QazAqparat - Ulttyq ǵylymı onkologııa ortalyǵy áleýmettik jelide aǵza satylatyny jaıly habarlandyrýlar zańǵa qaıshy ekenin málimdedi, dep habarlaıdy QazAqparat.

Ǵylymı ortalyqtyń málimdemesine Facebook jáne basqa da jelilerde taraǵan «búıregimdi satamyn» degen sekildi habarlandyrýlar sebep bolǵan.

«Qazaqstanda aǵza satyp alýǵa nemese satýǵa bola ma? Joq. Halyq densaýlyǵy týraly kodekstiń 209-baby 4-tarmaǵynyń 3-tarmaqshasyna sáıkes, transplantatsııalaǵan kezde adamnyń aǵzasyn (aǵzasynyń bir bóligin) nemese tinin satyp alýǵa jáne satýǵa tyıym salynady» dep eskertedi mekeme.

Jalpy, atalǵan kodekstiń 210-babyna jáne 212-babynyń 1 jáne 3-tarmaqtaryna sáıkes elimizde tiri jáne qaıtys bolǵan adam (aldyn ala kelisimimen) donor bola alady. Tek aǵzasyn sata almaıdy.

Qazaqstanda tiri donordan aǵzany aýystyryp salý týraly sheshimdi etıkalyq komıssııa qabyldaıdy.

Ol aǵza satý sekildi oqıǵalardyń aldyn alý jáne qaýipsizdik maqsatynda búkil qujattardy qaraıdy jáne yqtımal retsıpıent pen tiri donor arasyndaǵy genetıkalyq baılanysty belgileıdi.