Zańgerler sottardyń túsiniksiz áreketine aryzdandy
Zańger Іlıas Ahmetovtiń aıtýynsha, aqpan aıynda ǵana Esil aýdandyq sotynyń bir sýdıasy jabylǵan nesıe boıynsha aryz-talapty qanaǵattandyrsa, sáýirdiń basynda týra sol sýdıa osy ispettes isti keri qaıtardy. «Adamdar osyny túsinbeı jatyr. Sýdıalardyń ózderi de birqatar túsinispeýshiliktiń bar ekenin moıyndap, Joǵarǵy sotqa siltep otyr. Sol jaqtan túsiniktemeni kútip otyrmyz deıdi. Aıtpaqshy, erteń, 10 sáýir kúni Joǵarǵy sotta bankterdiń kassatsııalyq aryz-shaǵamdary qaralady. Endi, sottar osy isterdiń nátıjesine qaraı jumys júrgizetin shyǵar», - dedi І.Ahmetov elordada ótken baspasóz máslıhatynda.
Onyń sózine qaraǵanda, naýryzdyń sońynda áleýmettik jelilerde resmı bir hattyń kóshirmesi tarap ketti. Onda Joǵary sottyń azamattyq ister jónindegi alqanyń tóraǵasy E.N.Ábdiqadyrovtyń aýyzsha nusqaýyna silteme jasaı otyryp, kredıt pen zaımdarǵa qyzmet kórsetý komıssııalaryn óndirip alýǵa qatysty azamattyq isterdi qaramaýǵa jáne sheshim shyǵarmaýǵa tapsyrma berilgen. Kóp uzamaı, atalǵan hattyń kúshi joıyldy. «Negizi, bankterdiń ózderi komıssııalardy alyp tastaıtynyn málimdedi. Tipti, nesıe alǵan adamdarǵa SMS-habarlama jiberip, kredıt úshin aı saıynǵy tólemaqynyń qanshaǵa azaıatynyn da kórsetken. Sonda bankter komıssııalardyń zańsyz ekenin moıyndap otyr. Al sotqa kelgende qarsylyq bildirip, apellıatsııaǵa berip jatady. Aqshany ustap turamyz deı me? Máselen, bizdiń kómegimizge júgingen bir kelinshek bank komıssııalaryna 4 mıllıon (!) teńge tólegen. Sony qaıtarǵysy kelip otyr. Bankter ol aqshany qaıtarýǵa asyqpaıdy. Sottardyń naqty ustanymy joq. Sonyń saldarynan halyq óz aqshasyn qaıtara almaı otyr», - dep atap kórsetti І.Ahmetov.
