Zańger mamandyǵyna memlekettik grant úlesi óte az - depýtat
ASTANA. KAZINFORM – Qazaq tilinde zańgerlerge oqýlyq jazatyn avtorlarǵa tikeleı qoldaý tetigi jasalýy kerek. Bul týraly Senatta zań bilimin damytý taqyrybyna arnalǵan parlamenttik tyńdaýda depýtat Naýryzbaı Baıqadamov málim etti.
- Senattyń Konstıtýtsııalyq zańnama, sot júıesi jáne quqyq qorǵaý organdary komıteti júrgizilgen zerdeleý jumystary men oqý oryndary, quqyqtyq qaýymdastyqtardyń, sarapshylardyń usynystary negizinde sheshýdi talap etetin birneshe problema aıqyndaldy. Birinshiden, zańger mamandyǵyna memlekettik granttyń úlesi óte az bolǵandyqtan, kóbisi aqyly negizde oqýǵa májbúr. Oqý oryndary oqý qarjysyna qatysty tártipti saqtaı bermeıdi. Kóp jastar «kórpesine qaraı kósilip» arzan oqý oryndaryn tańdaıdy. Ol mekemelerdiń materıaldyq – tehnıkalyq bazasy tómen, kóbine ekinshi dıplom alatyndarǵa «jeńil» jol ashyp qoıǵandyǵy belgili. Ekinshiden, oqý oryndary men óndiris arasynda teorııalyq bilim men praktıkany úılesimdi baılanystyrý álsiz. Magıstranttar men doktoranttar óz oqýlary kezinde praktıkadan tys qalady. Maman daıyndaý isine sot júıesi, quqyq qorǵaý organdary ókilderi tikeleı aralasqany durys dep sanaımyz, - dedi N. Baıqadamov.
Onyń aıtýynsha, zań bilimin damytýdyń jańa tujyrymdamasynda árbir quqyqtanýshy-bakalavr kásibı quziretinde qoldanyp, quqyq shyǵarmashylyq protsesine qatysa alatyndaı deńgeıde qazaq tilin bilýi tıis delingen. Sońǵy úsh jylda memlekettik tilde zańgerlik bilim alýǵa suranystyń turaqty ósý úrdisi baıqalady. Degenmen, joǵary oqý oryndarynda qazaq tilindegi mamandar az jáne qazaq tilindegi oqýlyqtarmen qamtý úlesi kóńil kónshitpeıdi.
- Sondyqtan oqýlyq jazatyn avtorlar men qajet ádebıetterdi aýdaratyn mamandarǵa tikeleı qoldaý tetigi jasalýy kerek. Qazirgi ýaqytta árbir oqý orny arnaıy zań pánderiniń negizgi kompanentterin derbes túrde usynyp, bekitedi. Nátıjesinde, ár oqý oryndarynyń baǵdarlamalarynda eleýli alshaqtyq paıda bola bastaǵan. Biryńǵaı standarttar men baǵdarlamalar engizý týraly máseleni zerdeleý kerek. Magıstratýra men bakalavrıat baǵdarlamalarynyń ózara sabaqtastyǵyn jetildirý týraly usynystar tústi. Atap aıtqanda, zańdardyń sapaly bolýy úshin normashyǵarmashylyq protsestiń barlyq satylarynyń tıimdi uıymdastyrylýy qashanda mańyzdy. Zań jobalaryn ázirleýge qatysatyn analıtıkalyq ortalyqtar men sarapshylyq toptardy nyǵaıtý úshin Ádilet mınıstrliginiń ýákiletti organ retindegi quziretin kúsheıtýdi usynamyz, - dedi depýtat.
Budan buryn habarlanǵandaı, Senat tóraǵasy Máýlen Áshimbaev zańgerler daıarlaý isinde qordalanǵan problemalar bar ekenin aıtty.