Zańǵa qaıshy 5700-den astam ınternet-resýrs buǵattaldy
«Biz Internet jelisine zańǵa qarsy is-áreketterdi, balalardy azǵyrý, sýıtsıdtik oıyndar, buzýshylyqtar men qatygezdikke shaqyrý jáne jalǵan aqparatty taratýmen baılanysty aqparatty anyqtaý boıynsha únemi taldaý júrgizip otyramyz. Jyl basynan beri 7300 sheteldik ınternet-resýrstar anyqtaldy, onyń ishinde pornografııa, esirtki qylmysy, ınternet-kazıno qyzmeti, qarjy pıramıdalary jáne basqa da alaıaqtyq shemalar, qatygezdik pen sýıtsıdti nasıhattaý, qarý-jaraq satý jáne basqalary bar. Olardyń málimetteri Qazaqstan aýmaǵynan kirýdi buǵattaý úshin kıberbaqylaýdyń aqparattyq júıesine engizilgen. Qazirgi ýaqytta 5 736 resýrs buǵattaldy, qalǵandary tekserý satysynda tur», - dedi QR Іshki ister mınıstrligi Krımınaldyq polıtsııa departamentiniń kıberqylmyspen kúres ortalyǵy bastyǵynyń mindetin atqarýshy Rústem Dúısetaev Májilis komıtetiniń otyrysynda.
Ol balalar men kámeletke tolmaǵandarǵa qatysty qylmystardy anyqtaýǵa erekshe nazar aýdarylatynyn atap ótti.
«Birneshe mysal keltireıin. 2020 jyly monıtorıng barysynda biz kámeletke tolmaǵan qazaqstandyqtarǵa qatysty sýıtsıdtik sıpattaǵy top týraly aqparat aldyq. Jedel-izdestirý nátıjesinde áleýmettik jelilerde osyndaı toptar qurǵan Arys qalasynyń turǵyny ustaldy. Osylaısha «Jasyl mysyq» oıynyndaǵy 21 tapsyrmany oryndaý kerek bolǵan. Sońǵy tapsyrma zııandy suıyqtyqtardy qoldaný, bıik ǵımarattan sekirý jáne t.b. arqyly sýıtsıd jasaý bolǵan. Oıyn saldarynan ShQO-nyń 14 jastaǵy turǵyny zardap shekken. Qylmys anyqtalǵan kezde ol 14 tapsyrmany oryndaǵan edi. Osy jyldyń naýryz aıynda aýdandyq sot kúdiktini 4 jylǵa bas bostandyǵynan aıyrdy», - dedi Rústem Dúısetaev.
