Zań jobasy: Tutynýshy medıtsınalyq tehnıkany qaıtaryp bere alatyn bolady

ASTANA.KAZINFORM – Elimizde tutynýshyǵa medıtsınalyq tehnıkany satýshyǵa qaıtarýǵa múmkindik beretin zań normasy engizilýi múmkin. Bul týraly QR SIM Tutynýshylardyń quqyqtaryn qorǵaý komıteti tóraǵasynyń orynbasary Serik Qusaıynov aıtty.

— Sapasy buzylmaǵan azyq-túlikterge 14 kún ishinde qaıtaryp berý normasy júrmeıdi. Al eger sapasy buzylsa, máselen paıdalaný merzimi ótip ketse, onda ol taýarǵa atalǵan zań normasy júredi, ıaǵnı ony satýshyǵa qaıtaryp bere alasyz. Dári-dármekter de dál osyndaı. Merzimi ótip ketý, ónimniń qaptamasy bútin bolmaýy, shil qutysynyń shytynap ketýi sekildi sebeptermen júginseńiz, bıznes sýbektisi ony qaıtaryp alýǵa mindetti. Jańa zańda medıtsınalyq dári-dármekterdiń qaıtarýǵa jatpaıtyny týraly norma saqtalady, - dedi ol «Tutynýshylardyń quqyqtaryn qorǵaý: bıznes, memleket jáne qoǵam dıalogy» atty forýmda.

Spıker zań jobasynda budan bólek medıtsınalyq tehnıka kategorııasy bólek qaralyp jatqanyn aıtty. 

— Medıtsınalyq buıym degen bar da, medıtsınalyq tehnıka degen bar. Medıtsınalyq buıymǵa shprıts, sıstemany mysal etýge bolady. Ony tek bir ret qoldanýǵa bolady, sondyqtan ony qaıtarýǵa bolmaıdy. Al medıtsınalyq tehnıka dep qysym ólsheıtin tonometrdi aıtýǵa bolady. Adamdar turmystyq tehnıka sanalatyn mıkrotolqyndy peshti 14 kún ishinde satýshyǵa qaıtara alady.

Al tutynýshylardyń quqyǵyn qorǵaıtyn qazirgi zań boıynsha dál sondaı temir men plastmassadan jasalǵan tonometrdi qaıtara almaıdy. Sondyqtan qazir bul norma talqylanyp jatyr, ondaı buıymdy qaıtarýǵa bolady dep sanaımyz, - dep túıdi sózin Serik Qusaıynov

Eske sala ketsek, elimizde 2023 jyldyń qyrkúıeginen beri Tutynýshylardyń quqyǵyn qorǵaý týraly jańa zań jobasy qaralyp jatyr. Qazir ol Májilistiń qaraýynda.

Jańa zań qabyldanǵan soń tutynýshy 4 satyly shaǵymdaný kezeńderinen ótpesten, birden sotqa júgine alatyn bolady. 

Sondaı-aq tutynýshylar quqyǵyn qorǵaý ombýdsmeni ınstıtýty qurylady.

Elektrondyq saýda salasynda da ózgeris bolady. 

Áýe tasymaly salasynda bılet qunyn qaıtaryp alý múmkindigin beretin norma da engizilýi múmkin.