Zań jáne quqyq akademııasy túlekterine birden «aǵa leıtenant» sheni berilýi múmkin

ASTANA. KAZINFORM — Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde salaǵa reforma qajet ekenin málimdedi.

- Quqyq qorǵaý organdarynyń jumysyna servıstik model qaǵıdattaryn keńinen engizip, kadrlyq áleýetin kúsheıtý qajet.

Polıtsııa men basqa da qurylymdar bılik jáne qoǵam arasyn baılanystyratyn altyn kópir bolýǵa tıis. Ol úshin «Memleket pen azamat – birtutas» degen irgeli qaǵıdatymyzǵa tolyq saı keletin halyqpen qarym-qatynastyń jańa mádenıetin qalyptastyrý kerek. Bul baǵytta ilgerileý bar. Biraq qabyldanǵan sharalar áli tıimdiligin kórsetpedi, óıtkeni birizdilik joq. Halyqpen tikeleı jumys isteýge kedergi keltiretin basy artyq bıýrokratııadan arylý kerek.

Reformalardyń shynaıylyǵyna, ádildikke jáne memlekettik basqarý júıesiniń tıimdiligine azamattardyń senimi kóbine quqyq qorǵaý organdarynyń kásibı deńgeıine baılanysty, - dedi Prezıdent.

Qasym-Jomart Toqaev ýchaskelik ınspektorlardyń áleýetin odan ári nyǵaıtý qajet ekenin eskertti. Sebebi olar is júzinde memleket men qoǵam arasyndaǵy basty dáneker sanalady.

- Ásirese, bul aýyldyq jerde anyq baıqalady. Óıtkeni jergilikti turǵyndar úshin ýchaskelik ınspektor – qorǵaýshy, quqyqtyq keńesshi, tipti, ádildik surap júginetin sońǵy ınstantsııa. Meniń oıymsha, aýyldaǵy ýchaskelik ınspektorlarǵa shen bergen kezde jeńildik jasap, ıaǵnı bir jyldyq eńbek ótilin 1,5 jyl dep esepteý qajet. Aýyldaǵy ýchaskelik ınspektorlardy baspanamen qamtyp, materıaldyq-tehnıkalyq bazasyn nyǵaıtý kerek. Óńir ákimderi osy máselege muqııat nazar aýdarǵany durys.

Ýchaskelik polıtsııany jańǵyrtýmen qatar patrýldik beketter qyzmetiniń jumysyn qaıta qaraý qajet. Patrýl qyzmetkerleri azamattarmen jumys barysynda ádep saqtap, kásibılik tanytqany jón. Óz kezeginde azamattar da polıtsııanyń zańdy talabyna baǵynýǵa mindetti. Áıtpese kóshede tártip bolmaıdy, - dep túsindirdi Memleket basshysy.

Onyń sózinshe, jalpy azamattardyń qaýipsizdigi men zań talaptaryn múltiksiz saqtaý úshin quqyq qorǵaý júıesin odan ári reformalaý kerek. Biraq reformalar reforma úshin ǵana jasalmaıdy. Basty maqsat – qoǵamnyń quqyq qorǵaý júıesine senimin arttyrý.

- Keıbir qyzmetkerlerdiń ádiletsiz nemese nemquraıdy áreketi kúshtik qurylym ókilderiniń atyna kir keltiredi. Azamattar men bıznesten zańdy talap etkende, ózderińiz laıyqty úlgi kórsetýlerińiz qajet. Sonda ǵana polıtsııa qyzmetkerleri men azamattar arasynda senimdi áriptestik ornaıdy. Quqyq qorǵaý organdarynyń qyzmetin jetildirý qanshalyqty tabysty bolatyny sizderge baılanysty.

Bul rette memleket qoǵam qaýipsizdigi men eldegi zań ústemdigin qamtamasyz etetin jandardy jan-jaqty qoldaýǵa árqashan aıryqsha mán beredi. Meniń tapsyrmammen bıyldan bastap kúshtik qurylymdar eńbekaqy tóleýdiń jańa júıesine kóshti. Bul tásil, eń aldymen, aýdan deńgeıindegi qyzmetkerlerdiń jalaqysyn kóterýge múmkindik berdi. Máselen, úsh jyldyq tájirıbesi bar polıtsııa jedel ýákiliniń eńbekaqysy 60 paıyzǵa ósti. Biz tártip saqshylaryn quqyqtyq jáne áleýmettik turǵydan qorǵaý úshin keshendi sharalar qabyldaımyz, - dedi Qasym-Jomart Toqaev.

Ol vedomstvolyq joǵary oqý oryndary kýrsanttaryna jaǵdaı jasap, yntalandyrý mańyzdy ekenin alǵa tartty. Olar – bizdiń kúshtik qurylymdardyń bolashaǵy.

- Oqýda úzdik nátıje kórsetken jáne úlgili tártibimen erekshelengen akademııa túlekterine birden «aǵa leıtenant» shenin berý qajet dep sanaımyn. Sondaı-aq olarǵa bos jumys oryndarynan ózi qalaǵan qyzmet túrin tańdaýyna múmkindik berilýi kerek. Úkimet zańǵa engiziletin ózgeristerdi ázirlesin, - dedi Memleket basshysy.

Aıta keteıik, Prezıdent Úkimetke mobıldi operatorlardyń jaýapkershiligin kúsheıtýdi tapsyrdy.