Zań klınıkalaryn damytý boıynsha túbegeıli reformalar júrgizý qajet

ASTANA. KAZINFORM – Zań mamandyǵyn standarttaý máselesin keshendi túrde qarastyrý qajet. Bul týraly Senatta ótip jatqan parlamenttik tyńdaýda Ádilet mınıstri Erlan Sársembaev aıtty.

- Teorııalyq negizderi de, praktıkalyq daǵdylary da bar zańgerlerdi sapaly daıarlaý ózekti másele. Munda bizdiń oıymyzsha, erekshe nazar aýdarýdy qajet etetin birneshe másele bar. Birinshiden, qazirgi joǵary bilimniń úsh deńgeıli júıesi bakalavr jáne magıstr dárejeleri boıynsha bilim berý baǵyttarynyń mindetti túrde ózara baılanysty bolýyn talap etpeıdi. ıAǵnı, qazir beıindi emes joǵary bilimi bar tulǵa «Quqyq» baǵyty boıynsha magıstratýraǵa túse alady jáne ony aıaqtaǵannan keıin joǵary zań bilimi bar tulǵa bolyp sanalady, - dedi mınıstr.

Mysaly, onyń aıtýynsha, tehnıkalyq mamandyq boıynsha 4 jyl oqyǵan stýdent «Quqyq» boıynsha bir jyldyq magıstratýra kýrsynan ótip, baǵytyn túbegeıli ózgertip, nátıjesinde zańger bolyp jumys isteı alady. Demek, memlekettik qyzmetker retinde norma shyǵarýǵa tikeleı qatysa alady nemese sotta advokat retinde azamattardyń quqyqtaryn qorǵaıdy. Bul rette bilim týraly zań «Quqyq» baǵyty boıynsha jeke magıstr dárejesin tolyqqandy joǵary zań bilimine teńestirýge bola ma, joq pa degen suraqqa naqty anyqtama bermeıdi.

- Osy oraıda bul máseleni quqyqtyq naqtylyqty qamtamasyz etý turǵysynan pysyqtaý, sondaı-aq «Quqyq» baǵyty boıynsha bakalavrıat pen magıstratýra arasyndaǵy tikeleı baılanysqa qoıylatyn talaptardy belgileý oryndy dep sanaımyz, - dedi ol.

Mınıstr ekinshiden, «Kásiptik biliktilik týraly» Zań aıasynda zań mamandyqtaryn standarttaý máselesi pysyqtalyp jatqanyna toqtaldy.

- Jalpy, zań mamandyǵy kóp jaqty sanalady jáne negizgi quqyqtyq bilimnen bólek salalyq baǵyttardy qamtıdy. Osyǵan baılanysty ony standarttaý máselesin keshendi túrde qarastyrý qajet. Advokattar, notarıýstar, zań keńesshileri, jeke sot oryndaýshylary týraly aıtatyn bolsaq, olardyń qyzmeti zańnamamen tolyqqandy belgilengen.Óıtkeni bul qoǵamdyq quqyqtyq qatynastardan týyndaıdy. Zańnamada belgilengen lıtsenzııalaý, attestattaý jáne ózge de tetikter arqyly kásibı biliktilikti tekserý tártibi jalpy tártipten erekshelik sanalady jáne bólek standarttardy ázirleýdi talap etpeıdi, - dedi mınıstr.

Erlan Sársembaev úshinshiden, zań klınıkalarynyń áleýeti arqyly zań kadrlaryn daıarlaý sapasyn arttyrýǵa erekshe nazar aýdarylatynyn aıtty.

- Búgingi tańda Qazaqstanda zań klınıkalary tek 8 joǵary oqý ornynda bar, sondaı-aq, olardyń qyzmeti jetkilikti tanylmaǵan. Stýdentterdiń praktıkalyq baǵytyn jáne halyqtyń quqyqtyq saýattylyǵyn arttyrý maqsatynda zań klınıkalaryn damytý boıynsha túbegeıli reformalar júrgizý qajet, - dedi mınıstr.

Aıta keteıik, Senatta ótip jatqan sot jáne quqyq qorǵaý júıeleriniń, sondaı-aq normashyǵarmashylyq qyzmettiń sapasyn arttyrý maqsatynda memlekettik organdardyń zań qyzmetteriniń kadrlyq áleýetin nyǵaıtý aıasynda zań bilimin damytý máseleleri boıynsha parlamenttik tyńdaý barysynda palata tóraǵasy Máýlen Áshimbaev zań salasyndaǵy mamandardyń sany bar da sapasy joq ekenin aıtqan bolatyn.

Al búginde olardyń 97 paıyzy aqyly negizde bilim alyp jatyr.