Zamanaýı sáýlet óneriniń ozyq úlgisindegi Elbasy kitaphanasy
Mekeme kitaphananyń, arhıvtiń, mýzeıdiń, taldaý, mádenı-bilim berý jáne ǵylymı-zertteý ortalyǵynyń qyzmetin atqarady.
«Qazaqstan Respýblıkasynyń Tuńǵysh Prezıdenti - Elbasynyń kitaphanasy» MM Qazaqstan Respýblıkasynyń Prezıdenti N.Á.Nazarbaevtyń Jarlyǵymen 2014 jyldyń 13 naýryzynda Prezıdenttiń jeke kitaphanasy men jeke muraǵatynyń qyzmetin júzege asyrý, Qazaqstannyń qalyptasý jáne damý tarıhyn zerdeleý, Prezıdenttiń ıdeıalary men bastamalaryn elimizde jáne shet memleketterde ilgeriletý maqsatynda quryldy.
Elbasy kitaphanasy elordadaǵy Á. Bókeıhan kóshesi, 10 mekenjaıy boıynsha ornalasqan. Biregeı ǵımarat esimi álemge áıgili brıtanııalyq sáýletshi Norman Fosterdiń jobasy boıynsha turǵyzylǵan. Onyń qurylysy 2013 jyldyń naýryzynda támamdaldy.
Jalpy aýmaǵy 30 myń sharshy metrden astam ǵımarat aspanǵa zer salǵan kózdiń qarashyǵyn beıneleıdi. Sáýletshiniń oıy boıynsha onyń qaıtalanbas syrtqy kelbeti qazirgi Qazaqstannyń ómirsheń qýatyn, qaryshtap damý baǵdaryn bildiredi.
Elbasy kitaphanasynda ulttyq mádenı-tarıhı muraǵa aınalǵan zamanaýı elektrondy-muraǵat ınfraqurylymy jáne biregeı aqparattyq resýrstar bar. Kitaphanada ǵylymı jáne bilim berý maqsatynda álemdik basylymdardyń, East View Information Services, Inc amerıkalyq kompanııa merzimdi basylymdarynyń lıtsenzııalyq derekqorlaryn, reseılik Polpred.com derekqoryna, tolyq mátindi, anyqtamalyq-bıblıografııalyq, referatıvti jýrnaldardyń toptamalaryn paıdalanýǵa jaǵdaı jasalǵan.
Elbasynyń jeke kitaphanasy. Prezıdenttiń jeke kitaphanasyn ár jyldary Qazaqstan Respýblıkasynyń Prezıdenti N.Á. Nazarbaevqa syıǵa berilgen jáne Elbasynyń 1960 jyldan bastap jınaqtaǵan jeke (úı) kitaphanasy qoryndaǵy kitaptar men basylymdar quraıdy.
Qazaqstan Respýblıkasynyń Tuńǵysh Prezıdenti - Elbasy kitaphanasynyń qorynda N.Á. Nazarbaevtyń jeke toptamasyndaǵy jádigerler, merzimdi jáne elektrondy basylymdar jınaqtalǵan: memleket basshylary men olardyń resmı ókilderiniń syılyqtary, óner týyndylary jáne tarıhı máni zor qundylyqtar. Kitaphana qorynda sırek kezdesetin, kollektsııalyq jáne kóne basylymdar saqtalǵan: Memleket basshysyna Mılandaǵy Ambrozıan kitaphanasy tartý etken Leonardo da Vınchıdiń syzbalary bar albom, Elbasyna qazaqstandyq ǵaryshker T. Musabaev syılaǵan ǵarysh aılaǵynda bolǵan Quran, Qasıetti Qurandar toptamasy, Reseı ımperatory Aleksandr ІІ kitaphanasynda saqtalǵan F. Shlosserdiń «Vsemırnaıa ıstorııa» kitaby, 1838 jyly jaryq kórgen Entsıklopedııalyq leksıkon jáne basqalary.
Jeke arhıv. Elbasynyń jeke arhıvinde Qazaqstan Respýblıkasy Tuńǵysh Prezıdentiniń memlekettik jáne qoǵamdyq qyzmetine baılanysty 130 myńnan astam muraǵat qujattary, biregeı ómirbaıandyq, shyǵarmashylyq materıaldar saqtalǵan. Memleket basshysynyń ómiri men qyzmetiniń basty kezeńderi týraly jeke sıpattaǵy qujattar asa qundylyǵymen erekshelenedi: úlgerim tabeli, kýálik, kórikshiniń ruqsat qaǵazy, qurmet gramotasy, alǵys hattary, mandattary, depýtattyq bıletteri, ata-analarynyń qujattary jáne týǵan jeri jaıly málimetter.
Sonymen qatar Jeke arhıvtegi qujattar táýelsiz jáne egemen Qazaqstannyń qalyptasý úrdisin, prezıdenttik ınstıtýttyń qalyptasýyn, jas eldiń memlekettik qurylýyn, jańa astananyń qalyptasýyn, zań shyǵarýshy jáne atqarýshy bıliktiń kemeldenýin, basqarý apparatyn jetildirýdi, áleýmettik-ekonomıkalyq, mádenı jáne saıası damýdaǵy jetistikterdi sıpattaıdy.
Ekspozıtsııa-kórme qyzmeti. Mekeme ashylǵan ýaqyttan beri Kitaphananyń jumysymen 40 myńnan astam adam tanysty. Elbasy kitaphanasyna at basyn burǵan mártebeli meımandar qatarynda Monako knıazi Alber II, Reseı Federatsııasynyń Prezıdenti Vladımır Pýtın, Belarýs Respýblıkasynyń Prezıdenti Aleksandr Lýkashenko, Qyrǵyzstan Respýblıkasynyń Prezıdenti Almazbek Atambaev, Ýkraına prezıdenti Petr Poroshenko jáne taǵy basqa resmı tulǵalar bar.
Kitaphanada 8 ekspozıtsııalyq aýmaq bar. Elimizdiń ataýly jáne tarıhı mańyzdy kúnderine oraı taqyryptyq kórmeler uıymdastyrylady.
«Prezıdent» ekspozıtsııasy Qazaqstan Respýblıkasynyń Prezıdenti N.Á. Nazarbaev tulǵasyn jan-jaqty ashýǵa arnalǵan. Qundy jádigerler arqyly Memleket basshysynyń jeke zattary, qoljazbalary, eńbekteri, nagradalarymen tanysýǵa bolady.
«Prezıdent syılyqtary» ekspozıtsııasy Elbasyna ár jyldary tartý etilgen jáne Tuńǵysh Prezıdenttiń ómirimen jáne qyzmetimen baılanysty syılyqtar galereıasyna aınalǵan. Ekspozıtsııada kádesyılar, qarý-jaraq, ústel jáne qabyrǵa saǵattary, sporttyq kerek-jaraqtar qoıylǵan.
Interaktıvti ekspozıtsııa Qazaqstan Respýblıkasynyń Tuńǵysh Prezıdenti - Elbasynyń ıdeıalary men bastamalaryn, Memleket basshysynyń respýblıkany qalyptastyrý men damytýdaǵy rólin, Táýelsiz Qazaqstannyń tarıhyn jan-jaqty pash etetin bilim berý keshenine aınalǵan.
Elbasy kitaphanasynyń Taldaý ortalyǵy elimizdiń tolaıym tabystary jáne damý basymdyqtaryna, Memleket basshysynyń jahandyq bastamalaryna baılanysty jalpy álemdik máselelerdi zerdeleýge baǵyttalǵan halyqaralyq forýmdar men is-sharalardy uıymdastyrady.
Mekeme uqsas uıymdarmen qoıan-qoltyq jumys jasap, Ázerbaıjannyń, Qytaıdyń, Reseı Federatsııasynyń, AQSh, Sıngapýrdyń, Túrkııanyń, Frantsııanyń jáne basqa memleketterdiń uly saıası kóshbasshylary murasyn saqtaý jáne ilgeriletý boıynsha ozyq tájirıbeni zerdeleıdi.
Jobalar. Elbasy kitaphanasy qazaqstandyq jastardyń boıyna otansúıgishtikti uıalatý, Memleket basshysynyń jasampaz bastamalaryn ilgeriletý maqsatynda «Álemdi ózgertetin ıdeıalar» áleýmettik jobasyn qolǵa aldy. Onyń sheńberinde bilim berý mekemelerindegi úzdik oqýshylar men stýdentter úshin semınar-trenıngter ár apta saıyn uıymdastyrylady. Mazmundy dárister arqyly «Bes ınstıtýtsıonaldyq reformany iske asyrý jónindegi 100 naqty qadam» Ult josparynyń máni men mańyzdylyǵy tereń túsindiriledi.
