Zamanaýı medıtsına: aýyr dertten keıingi ońaltý qalaı júrgiziledi
Dárigerlerdiń kúni qarbalasqa toly, ózderine júktelgen mindetti abyroıly atqarý úshin naýqastarǵa tıisti em qoldanady, qajet bolǵan jaǵdaıda ota jasap, syrqattar tolyq aıaǵyna turyp ketpeıinshe baqylaýyna alady. Aýyr dertten keıin qalpyna keltirý emi men ońaltýdyń da mańyzy zor. Al ony tıimdi júzege asyrýǵa búginde zamanaýı tehnıka men jańa tehnologııalar kómekke kelgen. Kazinform agenttiginiń tilshisi Qazaqstan Respýblıkasy Prezıdenti Іs Basqarmasy Medıtsınalyq ortalyǵy aýrýhanasy qalpyna keltirý emi jáne ońaltý ortalyǵynyń basshysy Mádınat Júnisovany áńgimege tartyp, osy saladaǵy jańashyldyqtar jaıynda bildi.
- Ortalyqta qandaı naýqastar ońaltýdan ótedi?
- Bizdiń ortalyqqa naýqastar túrli mamandardyń joldamasy boıynsha aýrýlardan, jaraqattardan jáne otalardan keıin túsedi. Ońaltý 3 negizgi baǵyt boıynsha júrgiziledi: kardıologııa jáne kardıohırýrgııa, travmatologııa jáne ortopedııa, nevrologııa jáne neırohırýrgııa. Ońaltý 3 kezeń boıynsha ótedi. Ońaltýdyń ártúrli kezeńderine irikteý derttiń aýyrlyǵyna jáne reabılıtatsııa áleýetiniń mólsherine baılanysty. Erte ońaltýdyń 1-2 aptasynan keıin (birinshi kezeń) kompensatsııa men ońaltý áleýetiniń dárejesi baǵalanady, osy arqyly naýqas ońaltýdyń kelesi kezeńderine aýystyrylady. Aýrý bastalǵannan keıin 2 aptadan soń ońaltý áleýetin anyqtaý onyń mólsherin dál baǵalaýǵa múmkindik bere bermeıdi, biraq onyń barlyǵyn kórsetedi, basty belgisi - nevrologııalyq, kardıologııalyq, travmatologııalyq tapshylyqty qalpyna keltirýdi erte bastaý. Buzylǵan fýnktsııalardyń keri damýynyń alǵashqy belgileri neǵurlym erterek paıda bolsa jáne olardyń qarqyny neǵurlym tez bolsa, fýnktsııany qalpyna keltirý múmkindigi soǵurlym joǵary. Statsıonarlyq 2-kezeńge naýqastar aýrýdan nemese júrgizilgen otadan keıingi alǵashqy 6 aı ishinde, 3-kezeńge 6 aıdan keıin jiberiledi jáne úsh jyl boıy jylyna eki ret ambýlatorııalyq ońaltý kezeńinen ótip turady.
- Dárigerlerge toqtalar bolsaq, jalpy ortalyqta qansha qyzmetker bar?
- Bizdiń ujymda 120-dan astam adam eńbek etedi, olardyń ishinde reabılıtologter, ınerefleksoterapevter, manýaldy terapevter, dermatokosmetolog, psıhoterapevt, logoped, emdik dene shynyqtyrý nusqaýshylary, ergoterapevt, fızıomedbıkeler, massajıster bar. Bizdiń dárigerler Koreıada, Germanııada, Reseıde jáne Izraılde oqyp, bilimderin shyńdady, bul olardyń Qazaqstannyń basqa qalalarynyń mamandarymen tájirıbe bólisýine múmkindik beredi. Bizdiń basshylyq barlyq mamandardyń, sonyń ishinde ońaltý dárigerleriniń kóshpeli sheberlik saǵattaryn uıymdastyrdy. Mysaly, qazir birinshi top Atyraý qalasynda nevrologııalyq syrqattardyń PNF-ádistemesi boıynsha dáris oqyp jatyr, budan ári pýlmonologııa men kardıologııada ońaltýdy oqytý josparlanǵan.
- Qalpyna keltirý jáne ońaltý ortalyǵynyń basqa aýrýhanalardyń bólimshelerinen artyqshylyqtary men erekshelikterin tizip berińizshi...
- QR PІB Medıtsınalyq ortalyǵy aýrýhanasynyń qalpyna keltirý emi jáne ońaltý ortalyǵy birneshe bólimsheden turady: fızıoterapııa, emdik dene shynyqtyrý, shyǵys medıtsınasy ortalyǵy, sý-jylý emi jáne terapevtik blokty ońaltý sektory. Ortalyq qalanyń basqa klınıkalarynan erekshe, óıtkeni biz óz jumysymyzda álemdik óndirýshilerdiń joǵary tehnologııalyq jabdyqtarymen ushtastyra otyryp ozyq tehnologııalardy qoldanamyz, sonyń ishinde «Lokomat» robottandyrylǵan kesheni, gravıtatsııaǵa qarsy júgirý jolaǵy, joǵary qarqyndy lazer jáne joǵary qarqyndy magnıt, krıosaýna, «Amadeo» bıologııalyq keri baılanysy bar qoldyń usaq motorıkasyn qalpyna keltirýge arnalǵan robottandyrylǵan apparat jáne taǵy basqalar.
Biz ortalyqtyń qyzmetkerlerimen birge nevropatologter, kardıologter, travmatologter, neırohırýrgter, kardıohırýrgter jáne basqa da mamandar bar terapevtik jáne hırýrgııalyq beıindegi mýltıdıstsıplınarly topta jumys isteımiz. Bul kópsalaly tásil naýqastardy ońaltýda tıimdilik pen qalpyna keltirý múmkindigin arttyrady.
- Sizdiń kásibı jolyńyzǵa toqtalsaq...
- Meniń Prezıdenttiń Іs Basqarmasy Medıtsınalyq ortalyǵy aýrýhanasyndaǵy eńbek jolym 2002 jyly dermatokosmetolog dáriger retinde bastaldy. 2015 jyly medıtsınalyq ońaltý boıynsha qaıta daıarlaýdan ótip, emdik dene shynyqtyrý jáne kosmetologııa bóliminiń meńgerýshisi laýazymyna aýystym. 2018 jyly ońaltý qyzmetiniń jumysyn kúsheıtý úshin bizdiń basshylyq fızıoterapııa jáne shyǵys terapııasy, emdik dene shynyqtyrý, kosmetologııa jáne sý-jylý emi bólimshesin qalpyna keltirý emi jáne ońaltý ortalyǵyna biriktirý týraly sheshim qabyldady. Maǵan Ortalyqty basqarý senip tapsyryldy.
Sodan beri biz bir orynda turǵan joqpyz, osy jeti jyl ishinde únemi damyp, qyzmet kórsetý aıasyn keńeıtip kelemiz. Ujymymyz jas mamandarmen - reabılıtolog-dárigerlermen, emdik dene shynyqtyrý nusqaýshylarymen tolyqty, sondaı-aq kásibı ergoterapııa mamany, logoped-neıropsıholog, psıhoterapevt jumysqa qabyldandy, bul ońaltý qyzmetterin kóbeıtýge jáne naýqastarymyzdyń qalpyna kelý sapasyn jaqsartýǵa múmkindik berdi. Osy jyldar ishinde múddesi bir kásibı ujym quryldy, maqsatymyz – patsıentterimizdi aıaqtaryna turǵyzyp, kúndelikti ómirge qaıtarý. Qazirgi ýaqytta medıtsınalyq ońaltýǵa degen kózqaras ózgergen, medıtsınanyń osy baǵytynyń mańyzdylyǵy týraly túsinik paıda bolǵany qýantady.
- Áńgimeńizge rahmet!
